> ## Content Index
> Fetch the complete content index at: https://www.vaikomvartha.com/llms.txt
> Use this file to discover other available public pages before exploring further.

# മുപ്പത് മണ്ഡലങ്ങളിൽ ബി.ജെ.പി സ്ഥാനാർഥി പട്ടികയിൽ ഏകദേശ ധാരണയായതായി സൂചന
- URL: https://www.vaikomvartha.com/muppt-mnnddlngnglli-bi-je-pi-sthaanaa-thi-pttttikyi-eekdeesh-dhaarnnyaaytaayi-suucn/
- Published: 2026-02-18T10:22:11.000Z
- Updated: 2026-02-18T10:22:11.000Z
- Author:  Vaikom Vartha News Desk
- Tags: Latest News

തിരുവനന്തപുരം: നിയമസഭാ തിരഞ്ഞെടുപ്പിൽ മുപ്പത് മണ്ഡലങ്ങളിലേക്കുള്ള ബി.ജെ.പി സ്ഥാനാർഥികളുടെ പട്ടികയിൽ ഏകദേശ ധാരണയായതായി സൂചന. നേമത്ത് ബി.ജെ.പി സംസ്ഥാന അദ്ധ്യക്ഷൻ രാജീവ് ചന്ദ്രശേഖർ മത്സരിക്കും. വട്ടിയൂർക്കാവിൽ പ്രഥമപരിഗണന ആർ. ശ്രീലേഖയ്ക്കാണെന്നാണ് വിവരം. ധാരണയായതിൻ്റെ സൂചനങ്ങൾ ഇങ്ങനെയാണ്. കഴക്കൂട്ടത്ത് വി. മുരളീധരനും മഞ്ചേശ്വരത്ത് കെ. സുരേന്ദ്രനും മത്സരിക്കും. ശോഭ സുരേന്ദ്രൻ പാലക്കാടോ, കായംകുളത്തോ മത്സരിക്കും. തിരുവല്ലയിൽ അനിൽ ആൻ്റണി, പാലായിൽ ഷോൺ ജോർജ് എന്നിവരായേക്കും സ്ഥാനാർത്ഥികൾ.  
തിരുവനന്തപുരം സെൻട്രൽ മണ്ഡലത്തിൽ തിരുവനന്തപുരം ജില്ലാ പ്രസിഡൻ്റായ കരമന ജയന്റെ പേരാണ് പരിഗണനയിൽ. എന്നാൽ അതിനൊപ്പം തന്നെ കഴിഞ്ഞ തവണ ഈ മണ്ഡലത്തിൽ മത്സരിച്ച നടൻ കൃഷ്‌ണകുമാറിൻ്റെ പേരും പരിഗണനയിലുണ്ടെന്നാണ് വിവരം. ചൊവ്വാഴ്‌ച ചേർന്ന ബിജെപി തിരഞ്ഞെടുപ്പ് കമ്മിറ്റിയിൽ ഈ സാധ്യത പട്ടികയ്ക്ക് രൂപം നൽകിയെന്നാണ് വിവരം. ഇത് ഇനി കേന്ദ്രനേതൃത്വത്തിന് കൈമാറണം. ഓരോ മണ്ഡലത്തിലും മൂന്ന് പേരുകൾ വീതമാണ് പരിഗണനയിൽ. എന്നാൽ ചില മണ്ഡലങ്ങളിലെ സ്ഥാനാർഥികളുടെ കാര്യത്തിൽ ഇനി മാറ്റമുണ്ടാകില്ലെന്നാണ് ലഭിക്കുന്ന സൂചനകൾ.