> ## Content Index
> Fetch the complete content index at: https://www.vaikomvartha.com/llms.txt
> Use this file to discover other available public pages before exploring further.

# വമ്പന്മാരായ പനാമയെ സമനിലയിൽ കുരുക്കി ഇന്ത്യ; പുത്തനുണർവേകി റയാൻ വില്യംസ്
- URL: https://www.vaikomvartha.com/sports-news/
- Published: 2026-09-26T07:34:27.000Z
- Updated: 2026-09-26T07:34:27.000Z
- Author:  Vaikom Vartha News Desk
- Tags: Latest News, Sports

ബെംഗളൂരു: ഫിഫ റാങ്കിങ്ങിൽ 44-ാം സ്ഥാനത്തുള്ള പനാമയെ 1-1ന് സമനിലയിൽ തളച്ച് ഇന്ത്യൻ ഫുട്ബോൾ ടീമിന്റെ മികച്ച പ്രകടനം. ബെംഗളൂരു ശ്രീ കണ്ഠീരവ സ്റ്റേഡിയത്തിൽ നടന്ന ആവേശപ്പോരാട്ടത്തിൽ 41-ാം മിനിറ്റിൽ മുന്നേറ്റതാരം റയാൻ വില്യംസിലൂടെ ഇന്ത്യയാണ് ആദ്യം ലീഡെടുത്തത്. രണ്ടാം പകുതിയിൽ പനാമ തിരിച്ചടിച്ച് സമനില പിടിച്ചു. ലോകകപ്പ് കളിച്ച പരിചയമുള്ള പനാമയെപ്പോലൊരു കരുത്തരായ ടീമിനെതിരെ സമനില നേടാനായത് ഇന്ത്യൻ ആരാധകർക്ക് വലിയ ആവേശമാണ് സമ്മാനിച്ചിരിക്കുന്നത്. സമീപകാലത്തെ ഇന്ത്യയുടെ ഏറ്റവും മികച്ച പ്രകടനങ്ങളിൽ ഒന്നാണിത്.

​**ആരാണ് റയാൻ വില്യംസ്?**

ഓസ്‌ട്രേലിയയിൽ ജനിച്ച 32-കാരനായ റയാൻ വില്യംസ് അമ്മ വഴിയാണ് ഇന്ത്യയുമായി ബന്ധപ്പെടുന്നത്. മുംബൈയിലെ ആംഗ്ലോ-ഇന്ത്യൻ കുടുംബത്തിൽ നിന്നുള്ള ഓട്രിയാണ് റയാന്റെ അമ്മ. മുത്തച്ഛൻ ലിങ്കൺ ഗ്രോസ്റ്റേറ്റ് 1950-കളിൽ സന്തോഷ് ട്രോഫിയിൽ ബോംബെ ടീമിനായി ബൂട്ടണിഞ്ഞിട്ടുണ്ട്. ഫുട്ബോൾ മാനേജരായ എറിക് വില്യംസാണ് പിതാവ്.

![](https://storage.ghost.io/c/73/35/73353a9a-5bd9-4965-8a9f-0f7ff3ad2d79/content/images/2026/09/1000720434-16.jpg)

​ഇംഗ്ലീഷ് ക്ലബ്ബുകളായ ഫുൾഹാം, ബാൺസ്‌ലി, റോഥർഹാം യുണൈറ്റഡ്, ഓക്സ്ഫോർഡ് യുണൈറ്റഡ് എന്നിവയ്ക്കായി മികച്ച പ്രകടനം കാഴ്ചവെച്ച റയാൻ, ഓസ്‌ട്രേലിയയുടെ അണ്ടർ 20, അണ്ടർ 23 ടീമുകളെയും പ്രതിനിധീകരിച്ചിട്ടുണ്ട്. എ ലീഗിൽ പെർത്ത് ഗ്ലോറിക്കായി ഇറങ്ങിയ താരം, 2019-ൽ ദക്ഷിണ കൊറിയക്കെതിരായ സൗഹൃദ മത്സരത്തിലൂടെ ഓസ്‌ട്രേലിയൻ സീനിയർ ടീമിലും അരങ്ങേറി.

​**ഇന്ത്യൻ ജേഴ്സിയിലേക്കുള്ള വഴി**

2023-ൽ ഐഎസ്എൽ ക്ലബ്ബായ ബെംഗളൂരു എഫ്സിയിലെത്തിയതോടെയാണ് റയാൻ ഇന്ത്യൻ ഫുട്ബോൾ ആരാധകരുടെ പ്രിയങ്കരനാകുന്നത്. ഇന്ത്യയിൽ ഇരട്ടപ്പൗരത്വം അനുവദിക്കാത്തതിനാൽ ഓസ്‌ട്രേലിയൻ പൗരത്വം ഉപേക്ഷിച്ച അദ്ദേഹം 2025 നവംബറിൽ ഇന്ത്യൻ പൗരത്വം സ്വീകരിച്ചു. 2025 നവംബർ 18-ന് ഫുട്ബോൾ ഓസ്‌ട്രേലിയയുടെ എൻ.ഒ.സിയും തുടർന്ന് ഫിഫയുടെ അംഗീകാരവും ലഭിച്ചതോടെയാണ് ഇന്ത്യയ്ക്കായി കളിക്കാൻ അവസരമൊരുങ്ങിയത്. ഹോങ്കോങ്ങിനെതിരായ ഏഷ്യാ കപ്പ് യോഗ്യതാ മത്സരത്തിൽ ഇന്ത്യയ്ക്കായി അരങ്ങേറിയ റയാൻ, തന്റെ ആദ്യ ടച്ചിൽ തന്നെ ഗോൾ നേടി വരവറിയിച്ചിരുന്നു. റയാന്റെ സാന്നിധ്യം വരും നാളുകളിൽ ഇന്ത്യൻ ഫുട്ബോളിന് വലിയ കുതിപ്പേകുമെന്നാണ് ആരാധകരുടെ പ്രതീക്ഷ.