> ## Content Index
> Fetch the complete content index at: https://www.vaikomvartha.com/llms.txt
> Use this file to discover other available public pages before exploring further.

# വടക്കുംകൂർ മൂകാംബിക സരസ്വതി ക്ഷേത്രത്തിൽ ലളിതാ സഹസ്രനാമ ശ്ലോക ഹാര ഗ്രന്ഥം സമർപ്പിച്ചു
- URL: https://www.vaikomvartha.com/vadakamkoor-mukambika-temple/
- Published: 2026-07-10T05:17:45.000Z
- Updated: 2026-07-10T06:08:56.000Z
- Author:  Vaikom Vartha News Desk
- Tags: Latest News

വൈക്കം: ലളിതാസഹസ്രനാമത്തിലെ ഓരോ നാമത്തിന്റെയും ആത്മീയ, തത്ത്വചിന്താപര, മനഃശാസ്ത്രപര വ്യാഖ്യാനങ്ങൾ ഉൾക്കൊള്ളുന്ന വിനോദ് വർമ്മയുടെ പുതിയ ഗ്രന്ഥം പ്രസിദ്ധീകരണത്തിന് മുമ്പ് വടക്കുംകൂർ മൂകാംബിക സരസ്വതി ക്ഷേത്രത്തിൽ ദേവീപാദങ്ങളിൽ സമർപ്പിച്ചു. തൃപ്പൂണിത്തുറ വടക്കേ മാളിയേക്കൽ മഠത്തിൽ ശാരദയുടെ മകനായ വിനോദ് വർമ്മയാണ് ഗ്രന്ഥത്തിന്റെ രചയിതാവ്. കമ്പ്യൂട്ടർ സയൻസിലും ഗണിത ശാസ്ത്രത്തിലും ബിരുദാനന്തര ബിരുദധാരിയായ അദ്ദേഹം ഐ.ടി. രംഗത്തെ പ്രവർത്തനങ്ങൾ അവസാനിപ്പിച്ച് ആത്മീയ പഠനത്തിലും ഗവേഷണത്തിലും ശ്രദ്ധ കേന്ദ്രീകരിക്കുകയായിരുന്നു. ആയുർവേദ ഡോക്ടറായ വിനോദനി വർമ്മയാണ് ഭാര്യ.

![](https://storage.ghost.io/c/73/35/73353a9a-5bd9-4965-8a9f-0f7ff3ad2d79/content/images/2026/07/1000611485.jpg)

കഴിഞ്ഞ വൃശ്ചിക മാസത്തിലെ തൃക്കാർത്തിക നാളിൽ വടക്കുംകൂർ മൂകാംബിക സരസ്വതി ക്ഷേത്രത്തിൽ ദർശനം നടത്തുന്നതിനിടെയാണ് ലളിതാസഹസ്രനാമത്തെ ആസ്പദമാക്കി ഗ്രന്ഥം രചിക്കണമെന്ന ആശയം ഉദിച്ചതെന്ന് ഗ്രന്ഥകർത്താവ് പറഞ്ഞു. തുടർന്ന് വിവിധ ആധ്യാത്മിക ഗ്രന്ഥങ്ങളും ശാസ്ത്രസ്രോതസ്സുകളും ആസ്പദമാക്കി ദീർഘകാല പഠനത്തിനും ഗവേഷണത്തിനും ശേഷമാണ് ഗ്രന്ഥം പൂർത്തിയാക്കിയത്. വിതരണത്തിന് മുമ്പ് ദേവിയുടെ അനുഗ്രഹം തേടുന്നതിന്റെ ഭാഗമായാണ് ക്ഷേത്ര തന്ത്രി നാഗംപൂഴി മനയിൽ ഹരിഗോവിന്ദൻ നമ്പൂതിരിക്ക് ഗ്രന്ഥം സമർപ്പിച്ചത്. മേൽശാന്തി സുരേഷ് പോറ്റി, ക്ഷേത്രഭാരവാഹികൾ, ബന്ധുക്കൾ, ഭക്തജനങ്ങൾ എന്നിവർ ചടങ്ങിൽ പങ്കെടുത്തു. വിഷ്ണു സഹസ്രനാമത്തെ ആസ്പദമാക്കി വിനോദ് വർമ്മ മുമ്പ് രചിച്ച ഗ്രന്ഥം ആത്മീയരംഗത്ത് ശ്രദ്ധ നേടിയിരുന്നു. ലീലാവതി ടീച്ചറാണ് ആ ഗ്രന്ഥത്തിന് അവതാരിക തയ്യാറാക്കിയത്.

![](https://storage.ghost.io/c/73/35/73353a9a-5bd9-4965-8a9f-0f7ff3ad2d79/content/images/2026/07/1000602924-30.jpg)

ലളിതാസഹസ്രനാമത്തിലെ ഓരോ നാമത്തിന്റെയും സത്ത സനാതന ധർമ്മദർശനത്തിന്റെയും മനഃശാസ്ത്രത്തിന്റെയും ആധുനിക ശാസ്ത്രവീക്ഷണത്തിന്റെയും പശ്ചാത്തലത്തിൽ വിശദീകരിക്കുന്നതാണ് പുതിയ ഗ്രന്ഥത്തിന്റെ പ്രത്യേകത.