> ## Content Index
> Fetch the complete content index at: https://www.vaikomvartha.com/llms.txt
> Use this file to discover other available public pages before exploring further.

# പൂവണിയുന്നത് നാടിൻ്റെ വികസന സ്വപ്നങ്ങൾ
- URL: https://www.vaikomvartha.com/vaikom-news-209/
- Published: 2026-10-18T10:42:22.000Z
- Updated: 2026-10-18T10:42:22.000Z
- Author:  Vaikom Vartha News Desk
- Tags: Main News, Breaking News

വൈക്കം: പതിറ്റാണ്ടിൻ്റെ കാത്തിരിപ്പിന് വിരാമമിട്ട് മാക്കേക്കടവ് നേരേകടവ് പാലം ഇന്ന് നാടിന് സമർപ്പിച്ചു. ആലപ്പുഴ, കോട്ടയം ജില്ലകളിലെ ജനങ്ങളുടെ ദീർഘകാല സ്വപ്നം യാഥാർഥ്യമാകുന്ന ചരിത്രമുഹൂർത്തമായിരുന്നു രാവിലെ 10 മണിയോടെ മുഖ്യമന്ത്രി വി.ഡി. സതീശൻ പാലത്തിന്റെ ഉദ്ഘാടനം നിർവഹിച്ച് ഗതാഗതത്തിനായി തുറന്നുകൊടുത്തത്. വേമ്പനാട്ടുകായലിന് കുറുകെ ഉദയനാപുരം പഞ്ചായത്തിലെ നേരേകടവിനെയും ആലപ്പുഴ ജില്ലയിലെ തൈക്കാട്ടുശ്ശേരി പഞ്ചായത്തിലെ മാക്കേക്കടവിനെയും ബന്ധിപ്പിക്കുന്ന പാലം യാഥാർഥ്യമായതോടെ രണ്ട് ജില്ലകളിലെയും ജനങ്ങളുടെ യാത്രാദുരിതങ്ങൾക്ക് വലിയൊരളവിൽ പരിഹാരമാകുകയാണ്.

നിർദിഷ്ട തുറവൂർ-പമ്പ പാതയുടെ ഭാഗമായ പാലം ഗതാഗതത്തിനായി തുറന്നുകൊടുത്തതോടെ വേമ്പനാട്ടുകായലിന്റെ ഇരുകരകളെയും ബന്ധിപ്പിക്കുന്ന നേരിട്ടുള്ള റോഡ് ഗതാഗതപാത യാഥാർഥ്യമായി. കടത്തുവള്ളത്തെയും ദീർഘദൂര ചുറ്റുവഴികളെയും ആശ്രയിക്കേണ്ടിവന്നിരുന്ന പ്രദേശവാസികൾക്ക് പാലം വലിയ ആശ്വാസമാണ് നൽകുക. വർഷങ്ങളായി മുടങ്ങിയും വൈകിയും മുന്നോട്ടുപോയ പദ്ധതി പൂർത്തിയാക്കി ജനങ്ങൾക്ക് സമർപ്പിച്ചതോടെ പ്രദേശത്തിന്റെ വികസനചരിത്രത്തിൽ പുതിയ അധ്യായം തുറക്കുകയാണ്.

**98.09 കോടി രൂപയുടെ വികസനപദ്ധതി**

2011-12 സാമ്പത്തിക വർഷത്തെ ബജറ്റിൽ പ്രഖ്യാപിച്ച മാക്കേക്കടവ്-നേരേകടവ് പാലത്തിന് 98.09 കോടി രൂപയുടെ ഭരണാനുമതിയാണ് ലഭിച്ചത്. ടെൻഡറിൽ ഏറ്റവും കുറഞ്ഞ തുകയായ 78.40 കോടി രൂപയ്ക്ക് ചെറിയാൻ വർക്കി കൺസ്ട്രക്ഷൻസ് (CVCC Ltd) നിർമ്മാണക്കരാർ ഏറ്റെടുത്തു. പൊതു മരാമത്ത് വകുപ്പ് പാലങ്ങൾ വിഭാഗത്തിനായിരുന്നു നിർമ്മാണച്ചുമതല.

![](https://storage.ghost.io/c/73/35/73353a9a-5bd9-4965-8a9f-0f7ff3ad2d79/content/images/2026/10/1000720434-68.jpg)

2016ൽ നിർമ്മാണം ആരംഭിച്ചെങ്കിലും അപ്രോച്ച് റോഡിനാവശ്യമായ ഭൂമി ഏറ്റെടുക്കുന്നതുമായി ബന്ധപ്പെട്ട തർക്കങ്ങളും നിയമനടപടികളും പദ്ധതിയെ പ്ര തിസന്ധിയിലാക്കി. ഭൂമി ലഭ്യമാകാത്തതിനാൽ നിർമ്മാണം നീണ്ടുപോയി. 2022ൽ ഭൂമി ലഭ്യമായതിനെത്തുടർന്ന് പുതുക്കിയ എസ്റ്റിമേറ്റ് അംഗീകരിക്കുകയും 2024 മാർച്ചിൽ നിർമ്മാണം പുനരാരംഭിക്കുകയും ചെയ്തു. തുടർന്നുള്ള പ്രവൃത്തികൾ പൂർത്തിയായതോടെയാണ് പാലം ഉദ്ഘാടനത്തിന് സജ്ജമായത്.

**800 മീറ്റർ നീളത്തിൽ പാലം; ഇരുവശങ്ങളിലും നടപ്പാത**

800 മീറ്റർ നീളമുള്ള പാലത്തിന് ആകെ 11 മീറ്റർ വീ തിയുണ്ട്. 7.50 മീറ്റർ വീതിയിലുള്ള കാരിയേജ് വേയ്ക്ക് പുറമെ ഇരുവശങ്ങളിലും 1.50 മീറ്റർ വീതിയുള്ള നടപ്പാതകളുമുണ്ട്. ആകെ 22 സ്പാനുകളിലായാണ് പാലം നിർമ്മിച്ചിരിക്കുന്നത്. ഇതിൽ രണ്ട് നാവിഗേഷൻ സ്പാനുകൾക്ക് 47.16 മീറ്റർ വീതിയും നാല് സ്പാനുകൾക്ക് 35.76  
മീറ്റർ വീതിയും ശേഷിക്കുന്ന 16 സ്പാനുകൾക്ക് 35.09 മീറ്റർ വീതിയുമുണ്ട്.

ഉൾനാടൻ ജലഗതാഗതം സുഗമമാക്കുന്നതിനായി നാവിഗേഷൻ സ്പാനുകൾക്ക് MFL-ന്‌മുകളിൽ ഏഴ് മീറ്റർ ഉയരം ഉറപ്പാക്കിയിട്ടുണ്ട്. പാലത്തിലേക്കുള്ള അപ്രോച്ച് റോഡുകളും സർവീസ് റോഡുകളും നിർമ്മിച്ചിട്ടുണ്ട്. റോഡ്‌ ഗതാഗതത്തിനൊപ്പം കായലിലൂടെയുള്ള ജലഗതാഗതത്തിനും ആവശ്യമായ സൗകര്യങ്ങൾ പരിഗണിച്ചാണ് പാലം രൂപകൽപ്പന ചെയ്തിരിക്കുന്നത്.

**യാത്രാദൂരം കുറയും; വികസനസാധ്യതകൾ വർധിക്കും**

പാലം തുറന്നതോടെ മാക്കേക്കടവ്, ഉദയനാപുരം,വൈക്കം,പൂച്ചാക്കൽ, തൈക്കാട്ടുശേരി തുടങ്ങിയ പ്രദേശങ്ങൾ തമ്മിലുള്ള യാത്ര കൂടുതൽ സുഗമമാകും. വിദ്യാഭ്യാസ സ്ഥാപനങ്ങൾ, ആശുപത്രികൾ, വ്യാപാര കേന്ദ്രങ്ങൾ എന്നിവിടങ്ങളിലേക്ക് എത്തുന്നതിനുള്ള സൗകര്യം മെച്ചപ്പെടും. യാത്രയ്ക്കെടുക്കുന്ന സമയവും ചെലവും കുറയുന്നതിനൊപ്പം ആലപ്പുഴ, കോട്ടയം ജില്ലകൾ തമ്മിലുള്ള സാമൂഹികവും സാമ്പത്തികവുമായ ബന്ധങ്ങൾ കൂടുതൽ ശക്തിപ്പെടും. പ്രാദേശിക വ്യാപാരം, ചെറുകിട സംരംഭങ്ങൾ, കാർഷിക ഉൽപ്പന്നങ്ങളുടെ വിപണനം തുടങ്ങിയ മേഖലകൾക്കും മെച്ചപ്പെട്ട ഗതാഗതസൗകര്യം ഗുണകരമാകും. രണ്ടു ജില്ലകളിലെ ജനങ്ങളുടെ ദൈനംദിന യാത്രകൾ എളുപ്പമാക്കുന്നതിലൂടെ പ്രദേശത്തിന്റെ വികസനത്തിന് പാലം പുതിയ ദിശാബോധം നൽകുമെന്നാണ് പ്രതീക്ഷ.