ആലപ്പുഴ: മത്സ്യ തൊഴിലാളികളുടെ വറുതിയുടെ കാലം അവസാനിക്കുന്നു. സംസ്ഥാനത്ത് ട്രോളിങ് നിരോധനം നാളെ അവസാനിക്കും. കടലോര മേഖലയും മത്സ്യ ബന്ധന ഹാർബറുകളും ഉത്സാഹ തിമിർപ്പിലാണ്. 52 ദിവസം നീണ്ടുനിന്ന ട്രോളിങ് നിരോധനമാണ് നാളെ അർധരാത്രിയോടെ അവസാനിക്കുന്നത്. മത്സ്യബന്ധന ഹാർബറുകളില്‍ പ്രതീക്ഷയോടെ ഒരുക്കങ്ങള്‍ ആരംഭിച്ചു. ശനിയാഴ്ച പുലർച്ചെ മുതൽ കഴിഞ്ഞ 52 ദിവസത്തെ കാത്തിരിപ്പിനൊടുവിൽ ബോട്ടുകള്‍ കടലില്‍ ഇറങ്ങും. ട്രോളിങ് നിരോധനം അവസാനിക്കാനിരിക്കെ, നാട്ടിലേക്കു പോയ ഇതര സംസ്ഥാന തൊഴിലാളികള്‍ തിരിച്ചെത്തി. ബോട്ടുകള്‍ എൻജിൻ പണിയും മറ്റ് അറ്റകുറ്റ പണികളും തീർത്ത് പെയിന്റടിച്ച്‌ ഒരുങ്ങി കഴിഞ്ഞു. പുതിയ പ്രതീക്ഷയുടെ വലകളുമായി കടലമ്മയുടെ കനിവുമായി കടലാഴങ്ങളിൽ വലയെറിയാൻ മത്സ്യതൊഴിലാളികൾ തയ്യാറെടുത്തു കഴിഞ്ഞു. ഐസും വെള്ളവും മറ്റ് അവശ്യസാധനങ്ങളും ഒരുക്കുന്ന തിരക്കിലാണ് തൊഴിലാളികള്‍. ട്രോളിങ് നിരോധന സമയത്ത് പരമ്പരാഗത മത്സ്യത്തൊഴിലാളികള്‍ക്ക് മത്തിയും ചെമ്മീനും ലഭിച്ചിരുന്നു. കിളിമീൻ, കൂന്തള്‍, ചെമ്മീൻ എന്നിവയിലാണ് ബോട്ടുകാർക്ക് പ്രതീക്ഷയർപ്പിക്കുന്നത്. വലനിറയുന്ന കോളുമായി ആരവം നിറയുന്ന കടലോര മേഖലയിൽ ഇനി ഉണർവിൻ്റെ നാളുകളാണ്.