പറമ്പിലെ കളകൾ കറികളായി; വെള്ളൂരിൽ വ്യത്യസ്തമായ ഒരു 'കളസദ്യ'

വൈക്കം: നമ്മുടെ പറമ്പിലെ ചൊറിഞ്ഞണവും മുക്കുറ്റിയും കാട്ടു ചീരയും മുരിക്ക് ഇലയുമൊക്കെ ഔഷധഗുണമുള്ള കറികളാകും. അങ്ങനെയൊരു കളസദ്യ വൈക്കം വെള്ളൂരിലെ ഇറുമ്പയത്ത് നടന്നു. ഡോക്ടർ ഇ. സജീവ് കുമാറിന്റെ നേതൃത്വത്തിൽ തയ്യാറാക്കിയ ഈ കളസദ്യ സംഘടിപ്പിച്ചത് ഇറുമ്പയം ടാഗോർ ലൈബ്രറി ഭാരവാഹികളാണ്.

മുക്കുറ്റി പായസം മുതൽ പുളിയില രസം വരെ പത്തിനം കളകറികളാണ് സദ്യയിൽ വിളമ്പിയത്. പ്രദേശവാസികൾ പറിച്ചു കൊണ്ടുവന്ന പറമ്പിലെ കളചെടികൾ കഴുകി അരിഞ്ഞ് കൂട്ടി. അടുപ്പുകളിൽ തയ്യാറാക്കുന്നത് ആ കളകൾ കൊണ്ടുള്ള കറികളാണ്. പാറകം കായകളുടെ അച്ചാറും കാളനും, വാഴപിണ്ടിയും മഷിതണ്ടും ചേർത്ത് സാലഡ്, കാട്ടുചീര പച്ചടി, മനിലമുരിങ്ങ ചമ്മന്തി, ചൊറിഞ്ഞണം സ്റ്റൂ ഇങ്ങനെ പത്തിനം കള കറികൾ കൂട്ടി വയൽ ചീര സാമ്പാറുമൊഴിച്ചായിരുന്നു ഊണ്.

കൊങ്ങിണിപ്പൂ കുടിവെള്ളവും കുടിച്ച് ഏമ്പക്കം വിടുമ്പോൾ മുക്കുറ്റി പായസവും വിളമ്പി. പുറമെ പുളിയില രസവും. ഇറുമ്പയം ടാഗോർ ലൈബ്രറിയാണ് ഈ ഔഷധ കളസദ്യക്ക് കളമൊരുക്കി, ഒപ്പം ഗവേഷണാധിഷ്ഠിത സെമിനാറും വെള്ളൂരിൽ നടത്തിയത്. ഡോക്ടർ ഇ. സജീവ്കുമാറിൻ്റെ ഭക്ഷയോഗ്യമായ കളസസ്യങ്ങളെ സുരക്ഷിത ഭക്ഷണമാക്കി ജനകീയമാക്കുന്ന അന്നം സമം ഔഷധം എന്ന പദ്ധതിയിയിലാണ് ഈ കളസദ്യ നടന്നത്. ഇത് കണ്ട് കളസദ്യ ഒരുക്കാൻ പുറപ്പെടുമ്പോൾ ശാസ്ത്രം കൂടി അറിഞ്ഞ് വേണം പറമ്പിലെ കളകൾ പറിച്ച് കറിയാക്കാൻ.

അതിനായി കളസദ്യ വിളമ്പുന്നതിന് മുന്നോടിയായി നടത്തിയ സെമിനാറിലും പങ്കെടുത്താണ് നൂറിലധികം പേർ വെള്ളൂരിൽ കളസദ്യ ഉണ്ട് മടങ്ങിയത്.