ജനുവരി 10ന് ദൃശ്യവിസ്മയം ഒരുക്കി വ്യാഴം

എസ്. സതീഷ്കുമാർ

വ്യാഴം ഭൂമിക്ക് അഭിമുഖമായി വരുന്നു ജനുവരി പത്തിന്. ജ്യോതി ശാസ്ത്ര മേഖലക്കും വാനനിരീക്ഷകർക്കും കാഴ്ചവിരുന്നാവും അന്ന് മാനത്ത് ദൃശ്യമാവുക. ​സൗരയൂഥത്തിലെ ഏറ്റവും വലിയ ഗ്രഹമായ വ്യാഴം ജനുവരി 10നാണ് ഭൂമിക്ക് നേർവിപരീതമായി വരുന്നത്. സൂര്യനും വ്യാഴത്തിനും മധ്യത്തിലായി ഭൂമി വരുന്ന ഈ ദിവസം, വ്യാഴം ഭൂമിക്ക് ഏറ്റവും അടുത്തായിരിക്കും. ആകാശത്ത് മുഴുവൻ സമയവും അസാധാരണമായ തിളക്കത്തോടെ വ്യാഴത്തെ കാണാനും സാധിക്കും.​ ടെലിസ്കോപ്പിലൂടെ വ്യാഴത്തിലെ വർണ്ണമേഖലകളും (Cloud bands), നൂറ്റാണ്ടുകളായി നിലനിൽക്കുന്ന ഭീമൻ കൊടുങ്കാറ്റായ ഗ്രേറ്റ് റെഡ് സ്പോട്ട്' (Great Red Spot ) ഉും വ്യാഴത്തിന്റെ വലിയ നാല് ചന്ദ്രന്മാരായ അയോ, യൂറോപ്പ, ഗാനിമീഡ്, കാലിസ്റ്റോ എന്നിവയെയും നിരീക്ഷിക്കുന്നതിന് ഏറ്റവും പറ്റിയ സമയമാകും ജനുവരി പത്ത്. മനോഹരമായ വളയങ്ങളുള്ള ശനി (Saturn) ഗ്രഹത്തെയും, രാത്രിയിലെ അത്ഭുതക്കാഴ്ചയായ ഓറിയോൺ നെബുലയെയും (Orion Nebula ) അന്ന് കാണാം.​ മാനത്തെ ഈ മനോഹരമായ ദൃശ്യവിസ്മയം ആസ്വദിക്കുന്നതിനായി ആസ്ട്രോ കേരള കോട്ടയം ചാപ്റ്റർ നാട്ടകം - പാറച്ചാൽ ബൈപാസിൽ അന്ന് പൊതുജനങ്ങൾക്കായി വാനനിരീക്ഷണത്തിന് സൗകര്യമൊരുക്കും.