തലയോലപ്പറമ്പ്: വിശുദ്ധ വാരാചരണത്തിന് പ്രാർത്ഥനാ നിർഭരമായ തുടക്കം കുറിച്ച് തലയോലപ്പറമ്പ് സെന്റ്‌ ജോർജ് പള്ളിയിൽ ഓശാന ഞായർ ആചരിച്ചു. ക്രിസ്തു ദേവന്റെ ജറുസലം പ്രവേശനത്തെ വിശ്വാസസമൂഹം രാജകീയമായി എതിരേറ്റതിന്റെ ഓർമ്മയിലാണ് ഓശാന ഞായർ ആചരിക്കുന്നത്. ഓശാന തിരുകർമങ്ങൾ സെന്റ്‌ ജോർജ് സ്കൂൾ അങ്കണത്തിൽ ആരംഭിച്ചു. കുരുത്തോല വെഞ്ചരിച്ച് പ്രദക്ഷിണം പള്ളിയിലെത്തിയതോടെ വിശുദ്ധ കുർബാനയും പ്രസംഗവും നടന്നു. ഇടവക വികാരി റവ.ഫാ. സേവ്യർ ആവള്ളിൽ, റവ.ഫാ. ജോർജ് മേനാച്ചേരി, അസിസ്റ്റന്റ് വികാരി റവ.ഫാ. ആൽജോ കളപ്പുരയ്ക്കൽ എന്നിവരാണ് ഓശാന തിരുകർമങ്ങൾക്ക് കാർമ്മികത്വം വഹിച്ചത്. ഈസ്റ്റർ ദിന തിരുകർമ്മങ്ങൾ ശനിയാഴ്ച രാത്രി 10 ന് പാരിഷ്ഹാളിൽ ആരംഭിക്കും. തുടർന്ന് പ്രദക്ഷിണം നടക്കും. വിശുദ്ധ കുർബാന രാവിലെ 7 നും 9 നുമാണ് നടക്കുക.