വൈക്കം: മൂത്തേടത്തു കാവ് ഭഗവതി ക്ഷേത്രത്തിലേക്ക് മൂത്തേടത്തു കാവ് 1468 നമ്പർ എൻ.എസ്.എസ് കരയോഗം നടത്തിയ താലപ്പൊലി ഭക്തിസാന്ദ്രമായി. ദേശദേവതയായ മൂത്തേടത്ത് കാവ് ഭഗവതീ ക്ഷേത്രത്തിലെ വിഷു, നടയടപ്പ് ഉൽസവത്തിന്റെയും ഭാഗമായി നടന്ന താലപ്പൊലിയിൽ വൃതമെടുത്ത നിരവധി വനിതകൾ അണിനിരന്നു. ചെമ്മനത്തുകര പയറു കാട് ശ്രീകൃഷ്ണ സ്വാമി ക്ഷേത്രത്തിൽ നിന്നും വാദ്യമേളങ്ങളുടെ അകമ്പടിയോടെ നടന്ന എതിരേൽപ്പും താലപ്പൊലിയും കാവിലെത്തി സമർപ്പണം നടത്തി. രാത്രി 9 മണിയോടെ എതിരേൽപ്പ് പയറും കാട് ക്ഷേത്രത്തിൽ നിന്നും ആരംഭിച്ച് ക്ഷേത്രനടയിൽ എത്തുന്നതോടെ ഭഗവതിയുടെ കോലം വേതാളിയുടെ പുറത്ത് എഴുന്നള്ളിക്കും. തുടർന്ന് എതിരേൽപ്പ് നടക്കും. എതിരേൽപ്പിന് ശേഷം ക്ഷേത്രത്തിനുള്ളിൽ തീയാട്ട് നടക്കും. താലപ്പൊലിക്ക് കരയോഗം പ്രസിഡണ്ട് രാകേഷ് ടി. തുഷാര, സെക്രട്ടറി എം. ജയകുമാർ, വനിതാ സമാജം പ്രസിഡണ്ട് സിന്ധു രതീഷ്, സെക്രട്ടറി രമ്യ വിനിത് എന്നിവർ നേതൃത്വം നൽകി.