വടയാർ-തലയോലപ്പറമ്പ് റോഡ് ബി.എം.ബി.സി നിലവാരത്തിൽ പുനർനിർമിക്കും
വൈക്കം: നവകേരള സദസ്സിൽ ഉയർന്നുവന്ന പദ്ധതികളിൽ വൈക്കം നിയോജകമണ്ഡലത്തിലെ ഏഴു കോടി രൂപയുടെ നിർമാണപ്രവൃത്തിക്ക് സർക്കാർ അംഗീകാരം ലഭിച്ചു. വൈക്കം കോട്ടയം റോഡിൽ വടയാർ പാലത്തിന് പടിഞ്ഞാറുവശം മുതൽ തലയോലപ്പറമ്പ് പള്ളിക്കവല വരെയുള്ള അഞ്ചര കിലോമീറ്റർ റോഡിന്റെ ബി.എം ആന്റ് ബി.സി നിലവാരത്തിലുള്ള പുനർനിർമാണത്തിനും മറ്റ് അനുബന്ധ പ്രവൃത്തികൾക്കുമായാണ് ഏഴു കോടി രൂപ അനുവദിച്ചിരിക്കുന്നത്. തുടർന്നുള്ള സാങ്കേതിക നടപടികൾ കൂടി അടിയന്തിരമായി പൂർത്തികരിച്ചു നിർമാണം ഉടൻ ആരംഭിക്കുമെന്ന് സി.കെ. ആശ എം.എൽ.എ അറിയിച്ചു. വടയാർ പാലത്തിന് പടിഞ്ഞാറു വശവും പൊട്ടൻചിറ പമ്പിന് സമീപവുമടക്കം വെള്ളം കയറുന്ന ഭാഗങ്ങൾ ഉയർത്തിയായിരിക്കും നിർമാണ ജോലികൾ നടത്തുക.