തിരുവനന്തപുരം: ആറ്റുകാൽ പൊങ്കാലയ്ക്കിടെ പൊള്ളലേറ്റ് ചികിത്സയിലായിരുന്ന കോഴിക്കോട് സ്വദേശിനി മരിച്ചു. കോഴിക്കോട് സ്വദേശി വിജീഷ ആണ് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ അന്തരിച്ചത്. പൊങ്കാല ചടങ്ങുകൾക്കിടെയാണ് അപകടം സംഭവിച്ചത്. പൊങ്കാല അടുപ്പിൽ നിന്നും വിജീഷയുടെ വസ്ത്രത്തിലേക്ക് തീ പടരുകയായിരുന്നു. ഉടൻ തന്നെ സമീപത്തുണ്ടായിരുന്നവരും വളണ്ടിയർമാരും ചേർന്ന് തീ അണയ്ക്കുകയും മെഡിക്കൽ കോളേജ് ആശുപത്രിയിൽ എത്തിക്കുകയും ചെയ്തു. ശരീരത്തിൽ ഗുരുതരമായി പൊള്ളലേറ്റ വിജീഷ തീവ്രപരിചരണ വിഭാഗത്തിൽ ചികിത്സയിലായിരുന്നു. ഇന്ന് പുലർച്ചയോടെ ആരോഗ്യനില വഷളാവുകയും മരണം സംഭവിക്കുകയുമായിരുന്നു. നടപടിക്രമങ്ങൾ പൂർത്തിയാക്കിയ ശേഷം മൃതദേഹം ബന്ധുക്കൾക്ക് വിട്ടുനൽകും.