അഷ്ടമിക്ക് കേളികൊട്ടുയരുന്നു

വൈക്കം: ക്ഷേത്രനഗരിയിൽ അഷ്ടമിക്ക് കേളികൊട്ടുയരുന്നു. ഡിസംബർ 1നാണ് വൈക്കം മഹാദേവ ക്ഷേത്രത്തിൽ അഷ്ടമി മഹോത്സവം കൊടിയേറുക. തന്ത്രിമാരുടെ കാർമ്മികത്വത്തിൽ രാവിലെ 6.30നും 7.30നും ഇടയിലാണ് കൊടിയേറ്റ്. കൊടിയേറ്ററിയിപ്പ് നവംബർ 30 ന്. ഡിസംബർ 12 നാണ് വൈക്കത്തഷ്ടമി. വൈക്കത്തഷ്ടമിയുടെ മുന്നോടിയായ പുളളിസന്ധ്യവേലയുടെ കോപ്പുതൂക്കൽ ഒക്ടോബർ 24 ന് രാവിലെ 6.15 നും 9.45 നും ഇടയിൽ ദേവസ്വം കലവറയിൽ നടക്കും. പുള്ളിസന്ധ്യവേല ഒക്ടോബർ 27, 29, 31, നവം.2 തീയതികളിലാണ് നടക്കുക. മുഖസന്ധ്യവേലയുടെ കോപ്പുതൂക്കൽ നവംബർ 3ന് രാവിലെ 7.15 നും 9.15 നും ഇടയിലാണ്. മുഖസന്ധ്യവേല നവംബർ 4 മുതൽ 7 വരെ നടക്കും.  വൈക്കത്തഷ്ടമിയുടെ കോപ്പുതൂക്കൽ നവംബർ 30 ന് രാവിലെ 10 നും 11.30നും ഇടയിലാണ്. ഒന്നാം ഉത്സവദിനമായ ഡിസംബർ 1 ന് കൊടിപ്പുറത്ത് വിളക്കും അഞ്ചാം ഉത്സവദിനമായ ഡിസംബർ 5, ആറാം ദിനമായ, ഡിസംബർ 6, എട്ടാം ദിനമായ ഡിസംബർ 8, പതിനൊന്നാം ദിനമായ ഡിസംബർ 11 എന്നീ ദിവസങ്ങളിൽ ഉത്സവബലി. എഴാം ഉത്സവദിനമായ ഡിസംബർ 7 ന്  ഋഷഭവാഹനമെഴുന്നള്ളിപ്പ്. 8 ന് വടക്കും ചേരിമേൽ എഴുന്നള്ളിപ്പ്. 9ന് തെക്കും ചേരിമേൽ എഴുന്നള്ളിപ്പ്. പത്താം ഉത്സവനാളായ ഡിസംബർ 10 ന് വലിയ ശ്രീബലി, വലിയ വിളക്ക്. വൈക്കം മഹാദേവ ക്ഷേത്രത്തിലെ മാർഗഴി കലശം ഡിസംബർ 20 മുതൽ 29 വരെയാണ് നടക്കുക. കലശത്തിന്റെ ഭാഗമായ രുദ്രപൂജ ഡിസംബർ 30 നും ഉദയനാപുരം ക്ഷേത്രത്തിലെ ഉദയാസ്തമനപൂജ ഡിസംബർ 31 നും നടക്കും.

ഉദയനാപുരം സുബ്രഹ്മണ്യസ്വാമി ക്ഷേത്രത്തിലെ കൊടിയേറ്റ് നവംബർ 26ന് രാവിലെ 6.30 നും7.45നും ഇടയിൽ നടക്കും. പ്രസിദ്ധമായ തൃക്കാർത്തിക ഡിസംബർ 4നാണ്. തൃക്കാർത്തിക ഉത്സവത്തിന്റെ കോപ്പുതൂക്കൽ നവംബർ 25 ന് രാവിലെ 10.05നും 11.45നും ഇടയിൽ. ഡിസംബർ 5 ന് നടക്കുന്ന ആറാട്ടോടെ ഉദയനാപുരത്തെ കാർത്തിക ഉത്സവം സമാപിക്കും