വൈക്കം: ഫ്‌ളെഷ് ഡോർ ഹാൻഡിലുകൾ അഥവാ റെട്രാക്ടബിൾ ഹാൻഡിലുകൾ ഇന്ന് ആധുനിക കാറുകളുടെ ലുക്കും സാങ്കേതിക മികവും വർധിപ്പിക്കുന്ന ഘടകങ്ങളാണ്. എന്നാൽ, യാത്രക്കാരുടെ സുരക്ഷ മുൻനിർത്തി ഇത്തരം ഡോർ ഹാൻഡിലുകൾക്ക് നിയന്ത്രണമേർപ്പെടുത്താൻ ഒരുങ്ങുകയാണ് ചൈന.

ചൈനയുടെ പുതിയ നീക്കം?

​അപകടസമയങ്ങളിൽ ഡോറുകൾ തുറക്കാൻ സാധിക്കാതെ വരുന്നത് രക്ഷാപ്രവർത്തനത്തിന് തടസ്സമാകുന്നു എന്ന കണ്ടെത്തലിനെ തുടർന്നാണ് ചൈനീസ് വ്യവസായ-വിവര സാങ്കേതിക മന്ത്രാലയം പുതിയ കരട് നിയമം തയ്യാറാക്കിയത്. ഡിസംബർ പകുതിയോടെയാണ് ഈ പരിഷ്കാരം നടപ്പാക്കാനുള്ള തീരുമാനമായത്.

​നിർദ്ദേശത്തിലെ പ്രധാന കാര്യങ്ങൾ

• ​മെക്കാനിക്കൽ റിലീസ് നിർബന്ധം: വാഹനത്തിനുള്ളിൽ നിന്നും പുറത്തുനിന്നും നേരിട്ട് (Mechanically) പ്രവർത്തിപ്പിക്കാവുന്ന ഡോർ ഹാൻഡിലുകൾ എല്ലാ കാറുകളിലും ഉണ്ടായിരിക്കണം.
• ​പരിധി: 3.5 ടണ്ണിൽ താഴെ ഭാരമുള്ള പാസഞ്ചർ കാറുകൾക്കാണ് ഈ നിയമം ബാധകമാവുക.
• ​ലക്ഷ്യം: അപകടമുണ്ടായാൽ ഇലക്ട്രോണിക് സംവിധാനങ്ങൾ പരാജയപ്പെട്ടാലും പുറത്തുനിന്നുള്ളവർക്കോ പോലീസിനോ എളുപ്പത്തിൽ വാതിൽ തുറന്ന് യാത്രക്കാരെ രക്ഷിക്കാൻ സാധിക്കണം.

​എന്തുകൊണ്ട് ഫ്‌ളെഷ് ഹാൻഡിലുകൾ പ്രിയപ്പെട്ടതാകുന്നു?

​ടെസ്‌ല (മോഡൽ എസ് ,മോഡൽ 3, മോഡൽ വൈ), ബി.വൈ.ഡി സീൽ തുടങ്ങിയ പ്രീമിയം ഇലക്ട്രിക് വാഹനങ്ങളിൽ ഇത്തരം ഹാൻഡിലുകൾ വ്യാപകമാണ്. ഇതിന്റെ പ്രധാന കാരണങ്ങൾ ഇവയാണ്:

◾​എയറോഡൈനാമിക്സ്: കാറിന്റെ വശങ്ങളിൽ തടസ്സങ്ങളില്ലാത്തതിനാൽ വായുപ്രതിരോധം കുറയുന്നു.

◾​റേഞ്ച് വർധനവ്: ഊർജ്ജക്ഷമത കൂടുന്നതിലൂടെ ഇലക്ട്രിക് വാഹനങ്ങൾക്ക് കൂടുതൽ ദൂരം സഞ്ചരിക്കാനാകുന്നു.

◾​ഡിസൈൻ ഭംഗി: വാഹനത്തിന് കൂടുതൽ സ്പോർട്ടി ആയ ലുക്ക് നൽകുന്നു.

​എവിടെയാണ് പാളിച്ച സംഭവിക്കുന്നത്?

​വാഹനങ്ങൾ അപകടത്തിൽപ്പെടുമ്പോൾ വൈദ്യുതി ബന്ധം വിച്ഛേദിക്കപ്പെടുകയോ സെൻസറുകൾ തകരാറിലാകുകയോ ചെയ്താൽ, ഉള്ളിലേക്ക് മടങ്ങിയിരിക്കുന്ന ഈ ഹാൻഡിലുകൾ പുറത്തേക്ക് വരാറില്ല. ഇത് പല അപകടങ്ങളിലും യാത്രക്കാരുടെ ജീവൻ രക്ഷിക്കുന്നതിന് തടസ്സമായതായി റിപ്പോർട്ടുകളുണ്ട്.

​ഈ നിയമം നടപ്പിലാകുന്നതോടെ ആഗോളതലത്തിൽ തന്നെ കാർ നിർമ്മാതാക്കൾ തങ്ങളുടെ ഡിസൈനുകളിൽ മാറ്റം വരുത്താൻ നിർബന്ധിതരായേക്കും.