ആചാരനിറവിൽ കൊടിയേറ്ററിയിപ്പ്: വൈക്കത്തഷ്ടമിക്ക് നാളെ കൊടിയേറും

ആർ.സുരേഷ്ബാബു

വൈക്കം: വൈക്കം മഹാദേവക്ഷേത്രത്തിലെ അഷ്ടമി മഹോത്സവത്തിന് നാളെ രാവിലെ 6.30 നും 7.30 നും ഇടയിൽ കൊടിയേറും പ്രസിദ്ധമായ വൈക്കത്തഷ്ടമി 12 നാണ്. 13 ന് ആറാട്ടും ഉദയനാപുരം സുബ്രഹ്മണ്യ സ്വാമി ക്ഷേത്രത്തിൽ കൂടി പൂജയും കൂടിപ്പൂജ വിളക്കും നടക്കും. 14 ന് രാവിലെ 11 നാണ് മുക്കുടി നിവേദ്യം. അഷ്ടമിയുടെ കൊടിയേറ്ററിയിപ്പ് ആചാരപ്രകാരം നടന്നു. ക്ഷേത്രത്തിലെ പ്രഭാത പൂജയ്ക്ക് ശേഷം അവകാശിയായ കിഴക്കിനേടത്ത് വിഷ്ണു മൂസത് വൈക്കത്തപ്പന്റ അനുജ്ഞ വാങ്ങിയ ശേഷം ഓലക്കുട ചൂടി ചമയങ്ങളില്ലാത്ത ആനപ്പുറത്ത് കയറി ക്ഷേത്രത്തിന് ഒരു പ്രദക്ഷിണം പൂർത്തിയാക്കി കൊടിയേറ്ററിയിപ്പിനായി പുറപ്പെട്ടു. കൊടിയേറ്ററിയിപ്പിന് ഇത്തവണ ഗജരാജൻ തടുത്താവിള സുരേഷിനാണ് നിയോഗം ലഭിച്ചത്. വൈക്കം ക്ഷേത്രത്തിലെ കൊടിയേറ്റ് ഉദയനാപുരം ക്ഷേത്രത്തിലും ഉദയനാപുരം ക്ഷേത്രത്തിലെ കൊടിയേറ്റ് വൈക്കത്തും അറിയിക്കണമെന്നും ആചാരമുണ്ട്. പെരുമ്പളളിയാഴത്ത് മനയെ പ്രതിനിധീകരിച്ച് അയ്യർകുളങ്ങര കുന്തി ദേവി ക്ഷേത്രത്തിലും ഇണ്ടംതുരുത്തി ദേവി ക്ഷേത്രത്തിലും എത്തി മുഹൂർത്ത ചാർത്ത് വായിച്ച് കൊടിയേറ്ററിയിച്ചു. അതാത് അവസരങ്ങളിലെ ഊരാഴ്ചക്കാർ ഉൽസവ വിവരം ക്ഷേത്ര ഉടമസ്ഥരായ മറ്റു ഊരാഴ്ചക്കാരെ അറിയിക്കുക എന്ന ആചാരപ്രകാരമാണ് കൊടിയേറ്ററിയിപ്പ് നടന്നു വരുന്നത്. ഇണ്ടംതുരുത്തി മനയിൽ ദീപം തെളിച്ച് ഗണപതിയെ സങ്കല്പിച്ച് പഴം ശർക്കര എന്നിവ ഒരുക്കി സ്വീകരിച്ചു.

അഷ്ടമിവിളക്ക് തെളിയും

കൊടിയേറ്റിനെ തുടർന്ന് കൊടിമരച്ചുവട്ടിലെ അഷ്ടമിവിളക്കിൽ ദേവസ്വം കമ്മീഷണർ ബി.സുനിൽകുമാർ ദീപം തെളിക്കും. ആറാട്ട് വരെ ഈ ദീപം അണയാതെ സൂക്ഷിക്കും.

 കോപ്പുതൂക്കൽ

അഷ്ടമിയുടെ കോപ്പുതൂക്കൽ  നടന്നു. ക്ഷേത്ര  കലവറയിൽ നിറദീപം തെളിയിച്ച് വിഘ്നേശ്വരനെ സങ്കൽപ്പിച്ച് തുശനിലയിൽ പൂവൻപഴം സമർപ്പിച്ച ശേഷമാണ് കോപ്പുതുക്കൽ നടത്തിയത്. വൈക്കത്തഷ്ടമിയ്ക്കും സന്ധ്യ വേലക്കും മുന്നോടിയായായി ആചാര തനിമയോടെ ക്ഷേത്രത്തിൽ നടക്കുന്ന ചടങ്ങാണ് കോപ്പുതൂക്കൽ.ക്ഷേത്രത്തിലെ ആട്ടവിശേഷമായി വരുന്ന അടിയന്തരങ്ങൾക്ക് മുന്നോടിയായി നടത്തുന്ന ചടങ്ങ് വൈക്കത്തപ്പനും ഉപദേവതമാർക്കും വിശേഷാൽ വഴിപാട് നടത്തിയ ശേഷമാണ് നടത്തുക.ദേവസ്വം  ഡെപ്യൂട്ടി കമ്മിഷണർ ഇൻ ചാർജ് സി.എസ്. പ്രവീൺ കുമാർ ക്ഷേത്രത്തിലെ അടിയന്തരങ്ങൾക്ക് ആവശ്യമായ സാധനങൾ അളന്നു തൂക്കി  അഡ്മിനിസ്ട്രേറ്റിവ് ഓഫിസർ ജെ.എസ്. വിഷ്ണുവിനെ എൽപ്പിച്ചു. പ്രതീകാന്മകമായി മംഗള വസ്തുക്കളായ ചന്ദനവും മഞ്ഞളും അളന്നു എൽപ്പിച്ചതോടെ ചടങ്ങുകൾക്ക് വീഴ്ച വരാതെ നടത്തുന്നതിന് ക്ഷേത്ര കാര്യക്കാരനായ അഡ്മിനിസ്ട്രേറ്റിവ് ഓഫിസർ  എറ്റുവാങ്ങുന്നതായാണ്  വിശ്വാസം. 

സന്ധ്യവേല സമാപിച്ചു 

 വൈക്കത്തഷ്ടമി ക്ക് മുന്നോടിയായി സമൂഹങ്ങൾ നടത്തി വരുന്ന സന്ധ്യവേല സമാപിച്ചു. സമാപന സന്ധ്യവേല വടയാർ സമൂഹമാണ് നടത്തിയത്. ലക്ഷദീപം, പുഷ്പാലങ്കാരം പ്രാതൽ എന്നിവയും ദീപാരാധനക്ക് ശേഷം ഒറ്റപ്പണ  സമർപ്പണവും നടന്നു. ആചാരപ്രകാരം ബലിക്കൽ പുരയിൽ വെള്ള പട്ടു വിരിച്ച് അതിലാണ് ഒറ്റപ്പണ സമർപ്പണം നടത്തിയത്. പിന്നിട് കിഴിയാക്കി തലച്ചുമടായി എടുത്ത് വേദ മന്ത്രോച്ചാരണങ്ങളോടെ ക്ഷേത്രത്തിന് ഒരു പ്രദക്ഷിണം പൂർത്തിയാക്കി  ദേവസ്വത്തിൽ എല്പിച്ചു. ഇതിൽ നിന്നും ഒരു നാണയം കിഴിയാക്കിയെടുത്തത് അടുത്ത സന്ധ്യ വേലയുടെ പ്രാരംഭ ചടങ്ങുകൾക്കായി ഉപയോഗിക്കും. സന്ധ്യ വേലയുടെ മുന്നോടിയായി സമൂഹം ഭാരവാഹികൾ വിവിധ ക്ഷേത്രങ്ങളിൽ ദർശനം നടത്തി വിശേഷാൽ വഴിപാടുകൾ നടത്തിയിരുന്നു. കൊടിയേറ്റ് മുതൽ 12 വരെ സമൂഹത്തിൽ രുദ്രാഭിഷേകവുമുണ്ട്. സമൂഹം ഭാരവാഹികളായ എം. ഈശ്വരയ്യർ, മറ്റക്കാട്ട് ലക്ഷ്മണയ്യർ, ബി. ഗണേഷ്, എം.പി. ശർമ്മ, ശിവസുബ്രഹ്മണി, എൻ. ബാലസുബ്രഹ്മണ്യൻ, ചെന്നൈ മഹാദേവൻ, ആലപ്പാട് രാമചന്ദ്രൻ എന്നിവർ പങ്കെടുത്തു.

കൊച്ചാലുംചുവട്ടിൽ വിശേഷാൽ പൂജകൾ

വൈക്കത്തഷ്ടമിയുടെ ഭാഗമായി  കൊച്ചാലുംചുവട് ഭഗവതി സന്നിധാനത്തിൽ തന്ത്രി ഇണ്ടംതുരുത്തി മന കൃഷ്ണൻ നമ്പൂതിരിയുടെ കാർമ്മികത്വത്തിൽ വിശേഷാൽ പൂജകൾ നടന്നു. വൈക്കം ക്ഷേത്രത്തിലെ കൊടിയേറ്റിന് തലേ ദിവസം അഞ്ചാം ഉൽസവം, ഏഴാം ഉൽസവം, പതിനൊന്നാം ഉൽസവം എന്നീ ദിവസങ്ങളിലാണ് ഇവിടെ വിശേഷാൽ പൂജകൾ നടത്തുന്നത്. അഷ്ടമി നാളിൽ എഴുന്നള്ളുന്ന ഉദയനാപുരത്തപ്പനും ശ്രീ നാരായണപുരം ദേവനും കൂട്ടുമ്മേൽ ഭഗവതിക്കും ക്ഷേത്രസങ്കേതത്തിൽ രാജകീയ വരവേൽപ്പും നൽകും. അഷ്ടമി നാളിൽ 51 പറ അരിയുടെ അന്നദാനവും നടത്തുന്നുണ്ട് ചടങ്ങുകൾക്ക് ടി.കെ. രമേഷ് കുമാർ, സുധാകരൻ കാലാക്കൽ, ഖജാൻജി കെ.വി. പവിത്രൻ, ജിബു ആർ. കൊറ്റനാട്ട്, ബി. ഗോപകുമാർ, ദിലീപ് രവി, കെ. ശിവപ്രസാദ്, ജയൻ ഞള്ളയിൽ, എൻ.കെ. അജിമോൻ, പി.കെ. അജിമോൻ, എസ്.വി. ഹരികുമാർ എന്നിവർ നേതൃത്വം നൽകി.

കുലവാഴപ്പുറപ്പാട്

വൈക്കത്തഷ്ടമിക്ക് മുന്നോടിയായുള്ള  കുലവാഴപ്പുറപ്പാട് നടന്നു. വൈക്കം ടൗണിലെ സംയുക്ത എൻ.എസ്.എസ്. കരയോഗങ്ങളുടെ നേതൃത്വത്തിൽ  ആറാട്ടുകളങ്ങര ക്ഷീര വൈകുണ്ഠപുരം പാർത്ഥസാരഥി ക്ഷേത്രത്തിൽ നിന്നും  ആരംഭിച്ച കുലവാഴപ്പുറപ്പാടിന്  1573 നമ്പർ കിഴക്കുംചേരി നടുവിലെ മുറി കരയോഗമാണ് ആഥിഥേയത്വം വഹിച്ചത്. താലപ്പൊലി, വിവിധ വാദ്യമേളങ്ങൾ, മുത്തുക്കുട, ഗജവീരൻ എന്നിവ അകമ്പടിയായി. 1820 നമ്പർ പടിഞ്ഞാറ്റും ചേരി തെക്കെ മുറി, 1878 നമ്പർ കിഴക്കും ചേരി വടക്കെ മുറി, 1573 നമ്പർ കിഴക്കും ചേരി നടുവിലേ മുറി, 1603 നമ്പർ കിഴക്കും ചേരി തെക്കെ മുറി, 1880 നമ്പർ പടിഞ്ഞാറ്റുംചേരി വടക്കേ മുറി, 1634 നമ്പർ പടിഞ്ഞാറ്റും ചേരി പടിഞ്ഞാറെ മുറി എന്നി കരയോഗങ്ങളിലെ നൂറു കണക്കിന് പ്രവർത്തകർ കുലവാഴ പുറപ്പാടിൽ അണിചേർന്നു. മുരിയൻ കുളങ്ങര, ദളവാക്കുളം, കിഴക്കേ നട, പടിഞ്ഞാറെ നട വഴി വടക്കേ ഗോപുരനടയിൽ എത്തിയപ്പോൾ ക്ഷേത്ര ഭാരവാഹികൾ എത്തി ക്ഷേത്രത്തിലേക്ക് ആനയിച്ചു. കുലവാഴകളും കരിക്കിൻ കുലകളും കൊടിമരച്ചുവട്ടിൽ സമർപ്പിച്ചു. തുടർന്ന് ക്ഷേത്രത്തിന്റെ പ്രധാന ഭാഗങ്ങളിൽ കെട്ടി അലങ്കരിച്ചു. ഒന്നും രണ്ടും ഉത്സവങ്ങളിൽ കരയോഗങ്ങളുടെ നേതൃത്വത്തിൽ അഹസും കലാപരിപാടികളും നടത്തും. യൂണിയൻ പ്രസിഡണ്ട് പി.ജി.എം. നായർ കാരിക്കോട്, സെക്രട്ടറി അഖിൽ ആർ. നായർ, അംഗങ്ങളായ പി.എൻ. രാധകൃഷ്ണൻ, എസ്.യു. കൃഷ്ണകുമാർ കരയോഗം ഭാരവാഹികളായ ബി. ജയകുമാർ, രാജേന്ദ്ര ദേവ്, കെ.ജി. രാജലക്ഷ്മി, ശ്രീകുമാരി. യു. നായർ, എസ്. മധു, പി.എൻ. രാധാകൃഷ്ണൻ, കെ.പി. രവികുമാർ, എസ്. ഹരിദാസൻ നായർ, വി. ശിവരാമകൃഷ്ണൻ നായർ, കെ.എം. നാരായണൻ നായർ, എസ്. പ്രതാപ്, ശ്രീഹർഷൻ, എം. വിജയകുമാർ എന്നിവർ നേതൃത്വം നല്കി.

കലാമണ്ഡപമുണരും

മഹാദേവക്ഷേത്രത്തിലെ കലാമണ്ഡപത്തിൽ സിനിമാതരം ദിലീപ് ദീപം തെളിക്കും. സിനിമാതാരം ഗൗരീനന്ദ പങ്കെടുക്കും. ഇനിയുള്ള പന്ത്രണ്ട് ദിനരാത്രങ്ങൾ തുടർച്ചയായി ഇവിടെ കലാപരിപാടികൾ നടക്കും.

ക്ഷേത്രത്തിൽ നാളെ

രാവിലെ 5 ന് പാരായണം, 6.30 ന് കൊടിയേറ്റ്, 8.30 മുതൽ പാരായണം, 10 ന് മാനസ ജപലഹരി, 12.30 ന് ശ്രീപാദ സ്തുതി, 1.30 ന് ശിവാനന്ദലഹരി, 2 ന് പാരായണം, 3 ന് തിരുവാതിര, 4 ന് പാട്ടു കച്ചേരി, 5ന് ഭജൻസ്, 5.45 മുതൽ തിരുവാതിര, 8.15 ന് ഭരതനാട്യം, 9ന് കൊടിപ്പുറത്ത് വിളക്ക്.