ജില്ലയിലെ രണ്ടാമത്തെ അമ്പെയ്ത്ത് പരിശീലന അക്കാദമി ഉദ്ഘാടനം ചെയ്തു

തലയോലപ്പറമ്പ്: ഫിസിക്കലി ചലഞ്ച്ഡ് ഓൾ സ്പോർട്സ് അസോസിയേഷൻ കേരളയും ഫ്യൂച്ചർ ഒളിമ്പ്യൻസ് പ്രൊഫഷണൽ ആർച്ചറി ട്രെയിനിങ് അക്കാദമിയും സംയുക്തമായി ‌തലയോലപ്പറമ്പ് എ.ജെ ജോൺ മെമ്മോറിയൽ സ്കൂളിൽ ആരംഭിച്ച ജില്ലയിലെ രണ്ടാമത്തെ ആർച്ചറി അക്കാദമിയുടെ ഉദ്ഘാടനം തലയോലപ്പറമ്പ് പഞ്ചായത്ത് പ്രസിഡൻ്റ് ജോസ് വേലിക്കകം നിർവഹിച്ചു.
ഫിസിക്കലി ചലഞ്ച്ഡ് ഓൾ സ്പോർട്സ് അസോസിയേഷൻ സംസ്ഥാന പ്രസിഡൻ്റ് എ.എം. കിഷോർ അധ്യക്ഷത വഹിച്ചു.
സംസ്ഥാന ദേശീയ ആർച്ചറി മത്സരങ്ങളിൽ പങ്കെടുക്കുന്നതിനായി പുതിയ വിദ്യാർത്ഥികൾക്കുള്ള പ്രത്യേക പരിശീലനം നൽകുക എന്ന ലക്ഷ്യത്തോടെ ആരംഭിച്ച അക്കാദമിയിൽ ഐ.സി.എസ്.ഇ, സി.ബി.എസ്.ഇ, സ്റ്റേറ്റ് എന്നീ സിലബസുകളിൽ പഠിക്കുന്ന സ്കൂൾ കുട്ടികൾക്ക് സ്കൂൾ ഗെയിംസ് മത്സരങ്ങളിലും, മുതിർന്നവർക്ക് വേണ്ടി നടക്കുന്ന കേരളോത്സവം, മാസ്റ്റേഴ്സ് ഗെയിംസ് എന്നീ മത്സരങ്ങളിലും, ഭിന്നശേഷിക്കാർക്ക് വേണ്ടി നടക്കുന്ന പാരാ ആർച്ചറി മത്സരങ്ങളിലും പ്രത്യേക പരിശീലനം എല്ലാ ദിവസവും നൽകും.
തുടക്കഘട്ടത്തിൽ പരിശീലനത്തിന് ആവശ്യമായ ഉപകരണങ്ങൾ സൗജന്യമായി അസോസിയേഷൻ നൽകും. പഞ്ചായത്തംഗം മിനി ബെന്നി, സ്കൂൾ പ്രഥമാധ്യാപിക സി.മായാദേവി , പ്രിൻസിപ്പൽ എസ്. ശ്രീലത, പരിശീലകരായ സീതാ കോമളം, അജിത് കുമാരൻ എന്നിവർ പ്രസംഗിച്ചു.