കായൽ ശുചീകരണ യജ്ഞം

വൈക്കം: കായൽ സംരക്ഷണ യജ്ഞവുമായി വൈക്കം സഹൃദയ വേദി. സഹൃദയവേദിയുടെ നേതൃത്വത്തിൽ ജൂൺ 26 ന് വെള്ളിയാഴ്ച കായൽ സംരക്ഷണ യജ്ഞത്തിന് തുടക്കമാവും. 'മാലിന്യങ്ങൾ നീക്കൂ കായലിനെ രക്ഷിക്കൂ' എന്ന സന്ദേശവുമായാണ് കായൽ ശുചീകരണം നടത്തുന്നത്. ജൂൺ 26ന് രാവിലെ 10 മണിക്ക്‌ വൈക്കം ബോട്ട് ജെട്ടിയിൽ നിന്ന് ആരംഭിച്ച്‌ വള്ളത്തിൽ സഹൃദയ വേദിയുടെ ഇരുപതോളം സന്നദ്ധ പ്രവർത്തകർ കായലിലെ പ്ലാസ്റ്റിക് കുപ്പികളും, പ്ലാസ്റ്റിക്ക് മാലിന്യങ്ങളും ശേഖരിക്കും. കെ. ബിനിമോൻ എം.എൽ.എ ഉദ്ഘാടനം ചെയ്യും. ചടങ്ങിൽ മുനിസിപ്പൽ ചെയർമാൻ അബ്ദുൾ സലാം റാവുത്തറും വിവിധ വകുപ്പുമേധാവികളും, സഹൃദയ വേദി ഭാരവാഹികളും പങ്കെടുക്കുമെന്ന് വൈക്കം സഹൃദയ വേദി പ്രസിഡൻ്റ് അഡ്വക്കേറ്റ് എം.എസ്. കലേഷ്,.സെക്രട്ടറി സാബു വർഗീസ്, രക്ഷാധികാരികളായ പി.സോമൻപിള്ള, ആർ. സുരേഷ് എന്നിവർ അറിയിച്ചു.