സംസ്ഥാനത്ത് 43 ബ്രാൻഡ് മദ്യങ്ങളുടെ വില കുറച്ചു

തിരുവനന്തപുരം: സംസ്ഥാനത്ത് 43 ഓളം ബ്രാൻഡ് മദ്യങ്ങളുടെ വില കുറച്ചു. മദ്യകമ്പനികളാണ് വിലകുറച്ചത്. ഇതോടെ പത്ത് മുതൽ അൻപത് ശതമാനം വരെയാണ് വില കുറഞ്ഞത്. കൂടുതൽ ആവശ്യക്കാരുള്ള ബ്രാൻഡുകൾക്ക് ഉൾപ്പെടെ വില കുറഞ്ഞിട്ടുണ്ട്. വിദേശ നിർമിത മദ്യങ്ങളിൽ ചില ബ്രാൻഡുകളുടെ വിൽപ്പന കാര്യമായി കുറഞ്ഞ സാഹചര്യത്തിലാണ് കമ്പനികൾ വില കുറച്ചിരിക്കുന്നത്. വില കുറയ്ക്കുന്നതുമായി ബന്ധപ്പെട്ട് ഏതാനും മാസങ്ങൾക്കു മുമ്പ് മദ്യക്കമ്പനി പ്രതിനിധികളും ബവ്കോയും തമ്മിൽ ചർച്ച ചെയ്ത് ധാരണയിലെത്തിയിരുന്നു. ബവ്കോ ചില്ലറ വിൽപ്പന കേന്ദ്രങ്ങളിൽ വിലക്കുറവ് പ്രാബല്യത്തിൽ വന്നിട്ടുണ്ട്. 13 ബ്രാൻഡ് മദ്യത്തിന് കൂടി ഒരാഴ്ചയ്ക്കുള്ളിൽ വില കുറയ്ക്കുമെന്നാണ് പുറത്തുവരുന്ന വിവരം. സർക്കാർ മദ്യമായ ജവാന്റെ വിലയിൽ മാറ്റമില്ല.