വടകര: കെട്ടഴിഞ്ഞുപോയ പശു 10 അടിയോളം താഴ്ചയുള്ള ആൾമറയില്ലാത്ത കിണറ്റിൽ വീണു. വടകര നീർപ്പാറയിൽ
വെള്ളിയാഴ്ച വൈകിട്ട് അഞ്ചു മണിയോടെയായിരുന്നു സംഭവം.
നീർപ്പാറ കോട്ടപ്പുറത്ത് ആനന്ദവല്ലിയുടെ പ്രസവിച്ച് അധികനാളാകാത്ത നാലു വയസ് പ്രായമുള്ള പശുവാണ് അബദ്ധത്തിൽ കിണറ്റിൽ വീണത്.

പശുവിന്റെ കരച്ചിൽ കേട്ട് വീട്ടുകാരും സമീപവാസികളും ഓടിയെത്തിയെങ്കിലും രക്ഷപെടുത്താൻ കഴിയാത്തതിനെ തുടർന്ന് അഗ്‌നിരക്ഷാ സേനയെ വിവരമറിയിച്ചു. വൈക്കത്തു നിന്നുമെത്തിയ അഗ്‌നിരക്ഷാ സേന മണ്ണുമാന്തി യന്ത്രമുപയോഗിച്ച് മൂന്നര മണിക്കൂർ നേരത്തെ പരിശ്രമത്തിനൊടുവിൽ പശുവിനെ പുറത്തെടുത്തു. പശുവളർത്തൽ ഉപജീവനമാർഗ്ഗമായ ആനന്ദവല്ലിക്ക് ആവശ്യമായ എല്ലാ സഹായങ്ങളും നൽകുമെന്ന് രക്ഷാപ്രവർത്തനങ്ങൾക്ക് നേതൃത്വം നൽകിയ വെള്ളൂർ പഞ്ചായത്ത് 15-ാം വാർഡു മെമ്പർ ടി.എൻ. സുമി പറഞ്ഞു.