വൈക്കം: ആശാന്റെ കാവ്യലോകം-സാഹിത്യ ചർച്ചയും സംവാദവും നാളെ വടക്കേനട റെഡ്‌ക്രോസ് ഭവനിൽ നടക്കും. യുവകലാസാഹിതി വൈക്കം മണ്ഡലം കമ്മിറ്റിയുടെ പ്രതിമാസ സാഹിത്യ സായാഹ്ന പരിപാടികളുടെ തുടക്കമായാണ് സാഹിത്യ ചർച്ച നടത്തുന്നത്. ശനിയാഴ്ച വൈകിട്ട് 5 മണിക്കാണ് പരിപാടി. ആശാന്റെ കവിതകളിലെ മാനവികത, പ്രണയം, ദാർശനികത, സാമൂഹിക ബോധം തുടങ്ങിയ വിഷയങ്ങൾ വിശകലനം ചെയ്ത് സാഹിത്യകാരനും കോളമിസ്റ്റും ആയ റാംമോഹൻ പാലിയത്ത് പ്രഭാഷണം നടത്തും. യുവകലാസാഹിതി വൈക്കം മണ്ഡലം പ്രസിഡന്റ് പി. സോമൻ പിള്ള അധ്യക്ഷത വഹിക്കുന്ന ചടങ്ങിൽ കവി അരവിന്ദൻ കെഎസ്. മംഗലം ആമുഖ പ്രഭാഷണം നടത്തും.
കേരളത്തിന്റെ നവോത്ഥാന ചിന്തകൾക്ക് ശക്തമായ ആവിഷ്കാരം നൽകിയ മഹാകവി കുമാരനാശാന്റെ കാവ്യലോകത്തെ പുതിയ വായനകളിലൂടെ പരിചയപ്പെടുത്തുകയും സാഹിത്യ സംവാദങ്ങൾക്ക് വേദിയൊരുക്കുകയും ചെയ്യുക എന്ന ലക്ഷ്യമിട്ടാണ് പരിപാടി സംഘടിപ്പിക്കുന്നതെന്ന് യുവകലാസാഹിതി മണ്ഡലം സെക്രട്ടറി ശ്രീലത വർമ്മ, അനിൽ ബിശ്വാസ്, ആർ. സുരേഷ്, സാംജി ടി.വി പുരം എന്നിവർ അറിയിച്ചു.