വൈക്കം: നഗരസഭ ആരോഗ്യ വിഭാഗത്തിന് പുതിയ ടിപ്പർ ലോറി ഓഗസ്റ്റ് 15ന് ഓണസമ്മാനമായി ഫ്ലാഗ് ഓഫ് ചെയ്യും. വൈക്കം നഗരസഭയിൽ ശുചിത്വപ്രവർത്തനങ്ങൾ കാര്യക്ഷമമാക്കുന്നതിനു വേണ്ടിയാണ് നഗരസഭ പുതിയ ടിപ്പർ ലോറി ഓടിതുടങ്ങുന്നത്. കേരള ഖരമാലിന്യ പരിപാലന പദ്ധതിയിൽ 35 ലക്ഷം രൂപ വകയിരുത്തി നഗരസഭക്ക് വേണ്ടി വാങ്ങുന്ന ടിപ്പർ ലോറി നഗരസഭ ചെയർപേഴ്സൺ അബ്ദുൽ സലാം റാവുത്തറിന്റെ നേതൃത്വത്തിൽ നഗരസഭ വിഭാഗം ഷോറൂമിൽ എത്തി പരിശോധന നടത്തി. പ്രത്യേകം രൂപകൽപ്പന ചെയ്ത ബോഡിയുടെ പണികൾ ഒരുമാസം കൊണ്ട് പൂർത്തീകരിച്ച് പുറത്തിറക്കാനാണ് നീക്കം. ടിപ്പർ ഓടിത്തുടങ്ങുന്നതോടുകൂടി നഗരത്തിലെ മാലിന്യ നീക്കത്തിൽ വേഗത കൈവരും. ടാറ്റ 912 എൽ.പി.കെ മോഡൽ ടിപ്പർ ലോറിയാണ് ആണ് പ്രത്യേക രൂപകൽപ്പനയോടുകൂടി പുറത്തിറക്കുന്നത്. ആരോഗ്യകാര്യ സ്റ്റാന്റിംഗ് കമ്മറ്റി ചെയർമാൻ സോണി സണ്ണി, നഗരസഭ സെക്രട്ടറി രഞ്ജിത്ത് നായർ ആർ., സൂപ്രണ്ട് പ്രശാന്ത്, എസ്.ഡബ്ല്യൂ.എം എൻജിനീയർ ശ്രീമതി ശരണ്യ എസ്. എന്നിവരും ചെയർമാനൊപ്പം ലോറിയുടെ നിർമ്മാണ കാര്യങ്ങൾ വിലയിരുത്തി. സാങ്കേതിക പരിശോധനകൾക്ക് കെ.എസ്.ഡബ്ല്യൂ.എം.പി ഉദ്യോഗസ്ഥരാണ് നേതൃത്വം നൽകുന്നത്.