വൈക്കം: വിശുദ്ധ യൗസേപ്പ് പിതാവിന്റെ മരണതിരുനാൾ വ്യാഴാഴ്ച വൈക്കത്ത് വിവിധ ക്രൈസ്തവ ദേവാലയങ്ങളിൽ ഭക്തിനിർഭരമായ ചടങ്ങുകളോടെ ആചരിച്ചു. രാവിലെ 9.30ന് വിശുദ്ധ കുർബാന, വിശുദ്ധഗ്രന്ഥം വായന, വിശുദ്ധന്റെ തിരുസ്വരൂപം എഴുന്നള്ളിക്കൽ, ഊട്ടുനേർച്ച എന്നിവയായിരുന്നു പ്രധാന ചടങ്ങുകൾ. വൈക്കം ടൗൺ നടേൽ പള്ളിയിൽ നടത്തിയ ഊട്ടുനേർച്ചയിൽ നൂറുകണക്കിന് വിശ്വാസികൾ പങ്കെടുത്തു. പള്ളിവികാരി ഫാ.ആന്റണി പരവരയുടെ മുഖ്യകാർമ്മികത്വത്തിൽ സഹവികാരി ഫാ.ഷിബു ജോൺ ചാത്തനാട്ട് ഊട്ടുനേർച്ചയുടെ വിഭവങ്ങൾ വെഞ്ചരിച്ചു. ട്രസ്റ്റിമാരായ തോമസ് ഫിലിപ്പോസ് പാലയ്ക്കൽ, ആന്റണി ജോർജ് വാതപ്പിള്ളി, കൺവീനർ റോയി വർഗീസ് ചക്കനാട്ട്, ദേവാലയ ശ്രുശ്രൂഷി ജിമ്മിച്ചൻ പുത്തൻതറ എന്നിവർ പങ്കെടുത്തു. തിരുനാൾ പ്രദക്ഷിണത്തിന് ശേഷം ഊട്ടുനേർച്ച വിളമ്പി. വൈക്കം സെന്റ് ജോസഫ് ഫൊറോനാ പള്ളിയിൽ വികാരി ഫാ.ഡോ.ബർക്കുമാൻസ് കൊടയ്ക്കൽ ചടങ്ങുകൾക്ക് മുഖ്യകാർമ്മികനായിരുന്നു. ഫൊറോനായുടെ കീഴിലുള്ള ടി.വി പുരം, വല്ലകം, തലയോലപറമ്പ്, പൊതി, ഉദയനാപുരം, തോട്ടകം, ഒർശ്ലേം ദേവാലയം, കിളിയാറ്റുനട അമലാപുരിപള്ളി, ഉല്ലല ദേവാലയം, ഇടയാഴം ദേവാലയം, വെച്ചൂർ സെന്റ് മേരീസ് പള്ളി തുടങ്ങിയ ഇടവക ദേവാലയങ്ങളിലും വിശുദ്ധ യൗസേപ്പ് പിതാവിന്റെ മരണതിരുനാൾ ആചരിച്ചു.