ആഘോഷപൂർണ്ണിമയായി: മഹാദേവരുടെ കൊടിയേറ്റ് തിങ്കളാഴ്ച

ആർ.സുരേഷ്ബാബു

വൈക്കം: വൈക്കം മഹാദേവരുടെ കൊടിയേറ്റ് തിങ്കളാഴ്ച. ക്ഷേത്രനഗരിയിൽ ആഘോഷപൂർണ്ണിമ. വൈക്കം മഹാദേവ ക്ഷേത്രത്തിലെ  അഷ്ടമി മഹോത്സവത്തിന് ഒന്നിന് രാവിലെ 6.30 നും 7.30 നും ഇടയിൽ തന്ത്രിമാരായ ഭദ്രകാളി മറ്റപ്പള്ളി നാരായണൻ നമ്പൂതിരി, കിഴക്കിനിയേടത്ത് മേക്കാട് മാധവൻ നമ്പൂതിരി എന്നിവരുടെ കാർമ്മികത്വത്തിലാണ് കൊടിയേറുക. പ്രസിദ്ധമായ വൈക്കത്തഷ്ടമി 12നാണ്. അഷ്ടമി ദർശനം വെളുപ്പിന് 4.30 നും  ഉദയനാപുരത്തപ്പന്റെ വരവ്, അഷ്ടമി വിളക്കും രാത്രി 10 നുമാണ്. 13ന് വൈകിട്ട് 5നാണ് ആറാട്ട്. 14 ന് രാവിലെ 11ന് മുക്കുടി നിവേദ്യം.

കുലവാഴപ്പുറപ്പാട്

ആചാരനിറവിൽ സംയുക്ത എൻ.എസ്.എസ് കരയോഗങ്ങൾ നാളെ കുലവാഴപ്പുറപ്പാട് നടത്തും. വൈക്കം മഹാദേവക്ഷേത്രത്തിലെ അഷ്ടമി മഹോത്സവത്തിൻ്റെ ഭാഗമായ കുലവാഴ പുറപ്പാട് ടൗണിലെ ആറ് എൻ.എസ്.എസ് കരയോഗങ്ങൾ ചേർന്നാണ് നടത്തുക. താലൂക്ക് യൂണിയൻ മേൽനോട്ടം വഹിക്കും. വൈകിട്ട് 4 ന് ആറാട്ടുകുളങ്ങര ക്ഷീരവൈകുണ്ഠപുരം പാർത്ഥസാരഥി ക്ഷേത്രത്തിൽ നിന്നും പുറപ്പെടുന്ന കുലവാഴ പുറപ്പാടിന് 1573-ാം നമ്പർ കിഴക്കുംചേരി നടുവിലെമുറി കരയോഗമാണ് ആതിഥേയത്വം വഹിക്കുന്നത്. താലപ്പൊലി, വിവിധ വാദ്യമേളങ്ങൾ, മുത്തുക്കുട, ഗജവീരൻ എന്നിവ അകമ്പടിയാകും. 1820-ാം നമ്പർ പടിഞ്ഞാറ്റും ചേരി തെക്കെമുറി, 1878-ാം നമ്പർ കിഴക്കും ചേരി വടക്കെമുറി, 1573-ാം നമ്പർ കിഴക്കും ചേരി നടുവിലേമുറി, 1603-ാം നമ്പർ കിഴക്കും ചേരി തെക്കെമുറി, 1880 നമ്പർ പടിഞ്ഞാറ്റുംചേരി വടക്കേ മുറി, 1634-ാം നമ്പർ പടിഞ്ഞാറ്റും ചേരി പടിഞ്ഞാറെമുറി എന്നീ കരയോഗങ്ങൾ ചേർന്നാണ് കുലവാഴ പുറപ്പാട് നടത്തുക. കുലവാഴ പുറപ്പാട് മുരിയൻ കുളങ്ങര, ദളവാക്കുളം, കിഴക്കേ നട, പടിഞ്ഞാറെ നട വഴി വടക്കേ ഗോപുരനടയിൽ എത്തും. വൈകിട്ട് 6.30 ന് ക്ഷേത്ര ഭാരവാഹികൾ  ക്ഷേത്രത്തിലേക്ക് ആനയിക്കും.  കുലവാഴകളും കരിക്കിൻ കുലകളും കൊടിമരച്ചുവട്ടിൽ സമർപ്പിക്കും. തുടർന്ന് ക്ഷേത്രത്തിന്റെ പ്രധാന ഭാഗങ്ങളിൽ കെട്ടി അലങ്കരിക്കും. അഷ്ടമി ഒന്നും രണ്ടും ഉത്സവങ്ങളിൽ കരയോഗങ്ങളുടെ നേതൃത്വത്തിൽ അഹസും കലാപരിപാടികളും ഉണ്ടാകും. കരയോഗം ഭാരവാഹികളായ ബി. അനിൽകുമാർ, രാജേന്ദ്ര ദേവ്, കെ.ജി. രാജലക്ഷ്മി, ശ്രീകുമാരി. യു നായർ, എസ്. മധു, പി.എൻ. രാധാകൃഷ്ണൻ, കെ.പി. രവികുമാർ, എസ്. ഹരിദാസൻ നായർ, ശിവരാമകൃഷ്ണൻ നായർ എന്നിവർ നേതൃത്വം നല്കും.

കോപ്പുതൂക്കൽ

വൈക്കത്തഷ്ടമിയുടെ കോപ്പു തൂക്കൽ നാളെ ക്ഷേത്രകലവറയിൽ നടക്കും. രാവിലെ 10 നും 11.30  നും ഇടയിലാണ് കോപ്പു തൂക്കൽ. ക്ഷേത്രത്തിലെ ആട്ടവിശേഷമായി വരുന്ന അടിയന്തരങ്ങൾക്ക് മുൻപായി നടത്തുന്ന ചടങ്ങാണ് കോപ്പുതുക്കൽ. വൈക്കത്തപ്പനും ഉപദേവതമാർക്കും വിശേഷാൽ വഴിപാട് നടത്തിയ ശേഷമാണ് ചടങ്ങ്. ദേവസ്വം ഭരണാധികാരി അഷ്ടമിക്ക് ആവശ്യമായ സാധനങ്ങൾ  അളന്നു തൂക്കി ക്ഷേത്ര കാര്യക്കാരനെ എൽപ്പിക്കുന്നതാണ് ചടങ്ങ്. പ്രതീകാന്മകമായി മംഗള വസ്തുക്കളായ മഞ്ഞളും ചന്ദനവുമാണ് അളന്ന്  എല്പിക്കുക. 

കൊടിയേറ്ററിയിപ്പ്

മഹാദേവ ക്ഷേത്രത്തിലെ കൊടിയേറ്ററിയിപ്പ് നാളെ നടക്കും. വൈക്കം ക്ഷേത്രത്തിലെ വിശേഷാൽ ചടങ്ങുകൾക്ക് ശേഷം ആചാരപ്രകാരം അവകാശിയായ മൂസത് ഓലക്കുട ചൂടി  ചമയങ്ങളില്ലാത്ത ആനപ്പുറത്തെഴുന്നള്ളി ഉദയനാപുരം ക്ഷേത്രത്തിൽ  കൊടിയേറ്ററിയിക്കും. ഉദയനാപുരം ക്ഷേത്രത്തിലെ പന്തീരടി പൂജയ്ക്ക് ശേഷമാണ് മുഹൂർത്ത ചാർത്ത് വായിച്ച്  കൊടിയേറ്ററിയിക്കുന്നത്. പെരുമ്പള്ളിയാഴത്ത് മനയെ പ്രതിനിധീകരിച്ച് അയ്യർകുളങ്ങര കുന്തീദേവി ക്ഷേത്രത്തിലും ഇണ്ടംതുരുത്തി മനയിലും എത്തി ആചാര പ്രകാരം കൊടിയേറ്ററിയിക്കും. അതാത് അവസരങ്ങളിലെ ഊരാഴ്മക്കാർ ഉത്സവ വിവരം ഔദിഗികമായി ക്ഷേത്ര ഉടമസ്ഥരായ മറ്റു ഊരാഴ്മക്കാരെ അറിയിക്കുന്നതാണ് ചടങ്ങ്.

 കൊച്ചാലുംചുവട്ടിൽ പ്രത്യേക പൂജകൾ

അഷ്ടമിയോടനുബന്ധിച്ച് വടക്കേനടയിലെ  കൊച്ചാലുംചുവട് ഭഗവതി സന്നിധാനത്തിൽ നടത്തുന്ന പ്രത്യേക പൂജകൾ നാളെ ആരംഭിക്കും. രാവിലെ 7ന് തന്ത്രി ഇണ്ടംതുരുത്തിമന നീലകണ്ഠൻ നമ്പൂതിരിയുടെ കാർമ്മികത്വത്തിലാണ് ചടങ്ങുകൾ. വൈക്കം ക്ഷേത്രത്തിലെ കൊടിയേറ്റിന് തലേ ദിവസം, അഞ്ചാം ഉത്സവം, ഏഴാം ഉത്സവം, പതിനൊന്നാം ഉത്സവദിവസവും ഇവിടെ വിശേഷാൽ പൂജകൾ നടത്തും. അഷ്ടമി നാളിൽ എഴുന്നള്ളുന്ന ഉദയനാപുരത്തപ്പനും ശ്രീ നാരായണപുരം ദേവനും കൂട്ടുമ്മേൽ ഭഗവതിക്കും ക്ഷേത്രസങ്കേതത്തിൽ അലങ്കാരപ്പന്തൽ ഒരുക്കി രാജകീയ വരവേൽപ്പും നൽകും. അഷ്ടമി നാളിൽ 51 പറ അരിയുടെ അന്നദാനവും നടത്തുന്നുണ്ട്.

സന്ധ്യവേല നാളെ സമാപിക്കും

അഷ്ടമിക്ക് മുന്നോടിയായി സമൂഹങ്ങൾ നടത്തി വരുന്ന സന്ധ്യ വേല നാളെ സമാപിക്കും. സമാപന സന്ധ്യവേല  വടയാർ സമൂഹമാണ് നടത്തുന്നത്. ലക്ഷദീപം, പുഷ്പാലങ്കാരം എന്നിവയും ദീപാരാധനക്ക് ശേഷം ഒറ്റപ്പണ  സമർപ്പണവും നടക്കും.

വൈക്കം മഹാദേവ ക്ഷേത്രത്തിൽ നാളെ

വൈകിട്ട് 5 ന് ക്ലാസിക്കൽ ഡാൻസ്7 ന് ഭക്തി ഗാനാഞ്ജലി

ഉദയനാപുരം ക്ഷേത്രത്തിൽ നാളെ

രാവിലെ 5 ന് പാരായണം, 8 ന് ശ്രീബലി, 9 ന് ഭജൻസ്, 10 ന് തിരുവാതിര, 10.30 ന് വഞ്ചിപ്പാട്ട്, 11 ന് തിരുവാതിര, 12 ന് പ്രസാദ ഊട്ട്, ഭക്തി ഗാനമേള, 1.30 ന് ഭജൻസ്, 3 ന് തിരുവാതിര, 3.30 ന്  ഭക്തി ഗാനാഞ്ജലി, 5 ന് കർണ്ണാട്ടിക് സംഗീതം, 7 ന് നൃത്തനൃത്യങ്ങൾ, 8 ന് അത്താഴ ഊട്ട്, സ്കന്ദാർപ്പണ നൃത്ത സംഗീതിക, 10 ന് വിളക്ക്.