അനുസ്മരണ യോഗവും ചികിത്സ പഠനസഹായ വിതരണവും നടത്തി
വൈക്കം: കെ.എസ്.ഇ.ബി വർക്കേഴ്സ് അസോസിയേഷൻ സി.ഐ.ടി.യു വൈക്കം ഡിവിഷൻ കമ്മിറ്റിയുടെ നേതൃത്വത്തിൽ അനുസ്മരണ യോഗവും ചികിത്സ പഠനസഹായ വിതരണവും നടത്തി. മുൻപ്രസിഡന്റും ദീർഘകാലം കെ.എസ്.ഇ.ബി എംപ്ലോയീസ് കോ ഓപ്പറേറ്റീവ് സൊസൈറ്റിയുടെ പ്രസിഡണ്ടും കെ.എസ്.ഇ.ബി ഓഫീസേഴ്സ് അസോസിയേഷൻറെ ജില്ലാ കമ്മിറ്റി അംഗവും ആയിരുന്ന ടി.ടി രജിത്ത് മോന്റെ ഒന്നാം ചരമവാർഷിക അനുസ്മരണയോഗവും ചികിത്സാ സഹായ വിതരണവും വൈക്കം ഡിവിഷൻ ഓഫീസിൽ നടന്നു. സി.ഐ.ടി.യു സംസ്ഥാന കമ്മിറ്റി അംഗം കെ.കെ. ഗണേശൻ ഉദ്ഘാടനം ചെയ്തു. വൈദ്യുത മേഖല ഉൾപ്പെടെയുള്ള പൊതുമേഖലാ സ്ഥാപനങ്ങളെ സ്വകാര്യവൽക്കരിക്കുകയും തൊഴിലാളികളുടെ സംഘടിതശക്തിയെ ഇല്ലായ്മ ചെയ്യുന്ന ലേബർ കോഡുകൾ ഉൾപ്പെടെയുള്ള തൊഴിലാളി വിരുദ്ധ ജനവിരുദ്ധ നയങ്ങൾ നടപ്പിലാക്കുകയും ചെയ്യുന്ന കോർപ്പറേറ്റ് നിയന്ത്രിത കേന്ദ്ര ഗവൺമെന്റിന്റെ ഫാസിസ്റ്റ് നയങ്ങൾക്കെതിരെ പോരാട്ടങ്ങൾ സംഘടിപ്പിക്കുവാൻ തൊഴിലാളികൾ സജ്ജരാകണമെന്ന് യോഗം ഉദ്ഘാടനം ചെയ്ത് കെ.കെ. ഗണേശൻ പറഞ്ഞു. കെ.എസ്.ഇ.ബി വർക്കേഴ്സ് അസോസിയേഷൻ സംസ്ഥാന വൈസ് പ്രസിഡൻറ് അരുൺ ദാസ് അനുസ്മരണ പ്രഭാഷണം നടത്തി. കെ.എസ്.ഇ.ബി. വർക്കേഴ്സ് അസോസിയേഷൻ സംസ്ഥാന ഭാരവാഹിയായ കെ.യു.വിനോദ്, കെ.എസ്.ഇ.ബി വർക്കേഴ്സ് അസോസിയേഷൻ സംസ്ഥാന കമ്മിറ്റി അംഗങ്ങളായ റ്റി.എസ് ശ്രീജിത, എം.എം.മനോജ്, പ്രതീഷ് സി.പി, കെ.എസ്.ഇ.ബി വർക്കേഴ്സ് അസോസിയേഷൻ പാലാ ഡിവിഷൻ സെക്രട്ടറി ബോബി തോമസ്, മുൻ സംസ്ഥാന കമ്മറ്റി അംഗങ്ങളായ എ.പി. പ്രകാശ്, റ്റി.ജി.പ്രേംനാഥ് , കെ.എസ്.ഇ.ബി. ഓഫീസേഴ്സ് അസോസിയേഷൻ ജില്ലാ സെക്രട്ടറി ഡി അശോക്, പെൻഷണേഴ്സ് അസോസിയേഷൻ ജില്ലാ സെക്രട്ടറി ജി. ജയകുമാർ, കോൺട്രാക്ട് വർക്കേഴ്സ് അസോസിയേഷൻ ജില്ലാ സെക്രട്ടറി പി.ചന്ദ്രൻ, കേരള ഇലക്ട്രിസിറ്റി ഓഫീസേഴ്സ് ഫെഡറേഷൻ സംസ്ഥാന കമ്മിറ്റി അംഗം അനിൽകുമാർ കെ.ബി., കെ.ഇ.ഇ.സി (ഐ.എൻ.ടി.യു.സി) ഡിവിഷൻ സെക്രട്ടറി അജേഷ് കുമാർ, കെ.പി.ഡബ്ള്യൂ. സി ( ഐ.എൻ.ടി.യു.സി) ഡിവിഷൻ സെക്രട്ടറി സത്യൻ എം ഡി, വൈക്കം നഗരസഭാ കൗൺസിലർ അനിൽകുമാർ തുടങ്ങിയവർ യോഗത്തിൽ സംസാരിച്ചു. കെ.എസ്.ഇ.ബി വർക്കേഴ്സ് അസോസിയേഷൻ ഡിവിഷൻ പ്രസിഡൻറ് കെ.പി അനിൽകുമാർ അധ്യക്ഷത വഹിച്ച യോഗത്തിൽ സംസ്ഥാന കമ്മിറ്റി അംഗം അനീഷ് പി ഡേവിഡ് സ്വാഗതവും ഡിവിഷൻ സെക്രട്ടറി പ്രദീപ്കുമാർ സി ആർ കൃതഞ്ജതയും രേഖപ്പെടുത്തി. അനുസ്മരണ യോഗത്തിന്റെ ഭാഗമായി നിർധനരായ രോഗികൾക്കുള്ള ചികിത്സ സഹായവും സാമ്പത്തികമായി പിന്നോക്കം നിൽക്കുന്ന കുടുംബങ്ങളിലെ കുട്ടികൾക്കുള്ള പഠന സഹായവും വിതരണം ചെയ്തു.
Comments ()