വൈക്കം: ആൾ കേരള ഫോട്ടോഗ്രാഫേഴ്സ് അസോസിയേഷൻ (എ.കെ.പി.എ) വൈക്കം യൂണിറ്റിന്റെ ആഭിമുഖ്യത്തിൽ 'ദി എ.ഐ. എവലൂഷൻ ഓഫ് ഫോട്ടോ എഡിറ്റിംഗ്' എന്ന വിഷയത്തിൽ ഏകദിന ശില്പശാല സംഘടിപ്പിച്ചു. വൈക്കം റോട്ടറി ക്ലബ് സിറ്റി ഹാളിൽ നടന്ന ചടങ്ങിൽ എ.കെ.പി.എ ജില്ലാ വൈസ് പ്രസിഡന്റ് ഷൈമോൻ ശില്പശാല ഉദ്ഘാടനം ചെയ്തു. ഫോട്ടോഗ്രാഫി മേഖലയിൽ ആർട്ടിഫിഷ്യൽ ഇന്റലിജൻസ് വരുത്തുന്ന വിപ്ലവകരമായ മാറ്റങ്ങളെക്കുറിച്ചും, അഡോബ് ഫോട്ടോഷോപ്പ്, ലൈറ്റ്‌റൂം തുടങ്ങിയ സോഫ്റ്റ്‌വെയറുകളിലെ പുതിയ സാങ്കേതികവിദ്യകളെക്കുറിച്ചും പ്രമുഖ ഫോട്ടോഗ്രാഫർ റീനസ് ബാബു ക്ലാസ്സുകൾക്ക് നേതൃത്വം നൽകി. വൈക്കം യൂണിറ്റ് പ്രസിഡന്റ് ബിജു എൽമ അധ്യക്ഷത വഹിച്ച ചടങ്ങിൽ വൈക്കം മേഖല പ്രസിഡന്റ് രവീന്ദ്ര നാഥ ടാഗോർ ആശംസ അർപ്പിച്ചു. സംഘാടക സമിതിക്ക് വേണ്ടി സെക്രട്ടറി രാധാകൃഷ്ണൻ സ്വാഗതവും, ട്രഷറർ ഉമേഷ് പി. നായർ നന്ദിയും രേഖപ്പെടുത്തി. ജോയിന്റ് സെക്രട്ടറി സുബീഷ് ഇന്നൻസ്, കമ്മിറ്റി അംഗം ഷിബു ഇന്നൻസ് എന്നിവരും ചടങ്ങിൽ സംസാരിച്ചു. അമ്പതിലധികം ഫോട്ടോഗ്രാഫർമാർ പങ്കെടുത്ത ശില്പശാലയിൽ പുതിയ എ.ഐ ടൂളുകളായ ഫ്ലക്സ്, ടോപാസ്, ജമിനി തുടങ്ങിയവയുടെ പ്രായോഗിക വശങ്ങളും ചർച്ച ചെയ്തു.