ഹരിത അഷ്ടമി വിളംബര ഘോഷയാത്ര നടത്തി
വൈക്കം: വൈക്കത്തഷ്ടമി ഉത്സവത്തിന്റെ മുന്നോടിയായി വൈക്കം നഗരസഭയുടെ നേതൃത്ത്വത്തില്‍ ഹരിത അഷ്ടമി വിളംബര ഘോഷയാത്ര നടത്തി. ഹരിതകര്‍മ്മ സേനാ അംഗങ്ങള്‍, നഗരസഭ ജീവനക്കാര്‍, കുടുംബശ്രീ പ്രവര്‍ത്തകര്‍ എന്നിവര്‍ അഷ്ടമി വിളംബര ഘോഷയാത്രയില്‍ അണിചേര്‍ന്നു. പ്ലാസ്റ്റിക് മുക്ത ഹരിത സൗഹൃദ ആഘോഷങ്ങള്‍ സംഘടിപ്പിക്കുന്നതിന്റെ ഭാഗമായാണ് ഘോഷയാത്ര നടത്തിയത്. വടക്കേനട ദേവസ്വം ഗ്രൗണ്ടില്‍ നിന്നും വാദ്യമേളങ്ങളുടെ അകമ്പടിയോടെ സത്യാഗ്രഹ സ്മാരക ഹാളിലേക്കാണ് നഗരം ചുറ്റി ഘോഷയാത്ര നീങ്ങിയത്. നഗരസഭ സെക്രട്ടറി ആര്‍. രജ്ഞിത് നായര്‍, ക്ലീന്‍ സിറ്റി മാനേജര്‍ സുനിമോള്‍, വൈ.ജെ അസിസ്റ്റന്റ് എന്‍ജിനിയര്‍ എം.എന്‍. മഞ്ജുമോൾഎന്നിവര്‍ നേതൃത്ത്വം നല്‍കി.
