കായലിലെ പ്ലാസ്റ്റിക് മാലിന്യം ജലഗതാഗത വകുപ്പ് ജീവനക്കാർ നീക്കും: മന്ത്രി ഗണേഷ് കുമാർ

വൈക്കം: ജലഗതാഗത വകുപ്പ് ജീവനക്കാർ ഇനി കായലിലെ പ്ലാസ്റ്റിക് മാലിന്യവും നീക്കും. ഇതിനുള്ള സർക്കുലർ ഇറക്കാൻ മന്ത്രി ഗണേഷ് കുമാർ ജലഗതാഗത വകുപ്പ് മേധാവിക്ക് നിർദ്ദേശം നൽകി. യാത്രക്കിടയിൽ കായലിൽ കാണുന്ന മാലിന്യങ്ങൾ നീക്കാൻ ഉപകരണം സജ്ജമാക്കാനും മന്ത്രി നിർദേശിച്ചു. യാത്രക്കാർക്ക് തടസ്സം വരാതെ യാത്രയ്ക്കിടയിൽ തന്നെ വല പോലുള്ള ഉപകരണം സജ്ജീകരിച്ച് ഒഴുകിവരുന്ന മാലിന്യങ്ങൾ കോരി സ്റ്റേഷനിൽ എത്തിച്ച് തദ്ദേശ സ്ഥാപനങ്ങളെ ഏൽപ്പിക്കാനാണ് മന്ത്രി നിർദേശിച്ചത്. വൈക്കം ബസ് സ്റ്റേഷൻ സോളാർ സ്റ്റേഷൻ ആക്കുന്നതിന്റെ ആദ്യഘട്ട ഉദ്ഘാടനവും മൂന്നു സോളാർ ബോട്ടുകളുടെ യാത്രയും ഉദ്ഘാടനം ചെയ്ത് സംസാരിക്കുന്നതിനിടെയാണ് മന്ത്രി കായിലിൽ വൻതോതിൽ അടിയുന്ന മാലിന്യത്തെ പറ്റി സംസാരിച്ചത്.