തലയോലപ്പറമ്പ്: ലോക ക്യാൻസർ ദിനാചരണത്തോടനുബന്ധിച്ച് എറണാകുളം-അങ്കമാലി അതിരൂപതാ സാമൂഹ്യ പ്രവർത്തന വിഭാഗമായ സഹൃദയും തലയോലപ്പറമ്പ് സെൻ്റ് ജോർജ് ഇടവകയിലെ വിശ്വാസ പരിശീലന വിഭാഗവും ചേർന്ന് സംഘടിപ്പിച്ച കേശദാനയജ്ഞം നടന്നു.

63 വയസുള്ള ചിന്നമ്മ ഉമ്മാംകുന്ന് മുതൽ 9 വയസുകാരി സിയ അജോ വരെയുള്ള മുപ്പതിലേറെ പേർ പരിപാടിയിൽ കേശദാനം നടത്തി. മോൻസ് ജോസഫ് എം.എൽ.എ ഉദ്ഘാടനം ചെയ്തു. ക്യാൻസർ രോഗത്തെ ചികിത്സയിലൂടേയും ഇച്ഛാശക്തിയിലൂടേയും അതിജീവിക്കുന്നവർക്ക് കൂടുതൽ ആത്മവിശ്വാസം പകരാൻ കേശദാനം പോലുള്ള നന്മപ്രവൃത്തികൾ സഹായകമാകുമെന്ന് അഡ്വ.മോൻസ് ജോസഫ് എം.എൽ.എ. അഭിപ്രായപ്പെട്ടു. ജീവിത, ഭക്ഷണ ശൈലികൾ ക്രമീകരിച്ച് കാൻസർ രോഗത്തെ പ്രതിരോധിക്കുന്നതിനൊപ്പം രോഗബാധിതർക്ക് ചികിത്സയും അതിജീവനത്തിനുള്ള സാമൂഹ്യ പിന്തുണയും ഉറപ്പാക്കുവാൻ സമൂഹത്തിനു കടമയുണ്ടെന്നും മോൻസ് പറഞ്ഞു. സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ അധ്യക്ഷത വഹിച്ചു. കാൻസർ ചികിത്സ മൂലം മുടി നഷ്ടപ്പെടുന്നവർക്ക് സൗജന്യമായി വിഗ് ലഭ്യമാക്കുന്നതിനാണ് സഹൃദയ കേശദാനം പ്രോത്സാഹിപ്പിക്കുന്നതിനാണ് ഈ കേശദാന ജ്ഞം സംഘടിപ്പിച്ചത്. തലയോലപ്പറമ്പ് ഇടവക സഹവികാരി ഫാദർആൽജോ കളപ്പുരയ്ക്കൽ മുഖ്യസന്ദേശം നൽകി. പള്ളി കൈക്കാരൻ തങ്കച്ചൻ കളമ്പുകാട്ട്, ഗ്രാമപഞ്ചായത്തംഗം ശില്പ സാജു, വിശ്വാസപരിശീലന വിഭാഗം ഹെഡ്മാസ്റ്റർ തോമസ് സ്കറിയ എന്നിവർ പങ്കെടുത്തു.