വൈക്കം: ഇന്നലെ സന്ധ്യയോടെ ഉണ്ടായ ശക്തമായ കാറ്റിൽ ആഞ്ഞിലി മരം കടപുഴകി വീണ് തലയാഴത്ത് രണ്ട് വീടുകൾക്ക് നാശനഷ്ടമുണ്ടായി. തലയാഴം ചേന്തുരുത്ത് പാലയ്ക്കത്തറ ബൈജുവിൻ്റെ വീടിനും സമീപത്തെ ചെറിയാന്തറ സലിയുടെ വീടിനുമാണ് കേടുപാടുകൾ സംഭവിച്ചത്. ഇന്നലെ ചുഴിക്കാറ്റിൽ ചേന്തുരുത്ത് ഭാഗത്ത് വ്യാപക നാശമാണുണ്ടായത്. ലൈഫ് പദ്ധതിയിൽ ഉൾപ്പെടുത്തി അഞ്ചുമാസം മുമ്പ് നിർമിച്ച ബൈജുവിൻ്റെ വീടിൻ്റെ അടുക്കള ഭാഗത്തെ സൺഷേഡാണ് മരം വീണ് തകർന്നത്. വീടിന് സമീപത്തുണ്ടായിരുന്ന ഷീറ്റുമേഞ്ഞ ഷെഡും വാട്ടർടാങ്കും തകർന്നു. ചെത്തുതൊഴിലാളിയായ ബൈജുവും ഭാര്യയും മകളുമാണ് ഇവിടെ താമസിക്കുന്നത്. സമീപത്തെ സലിയുടെ വീടിൻ്റെ ടിൻഷീറ്റ് ഇട്ടിരുന്ന ഭാഗത്തേക്കാണ് ആഞ്ഞിലി കടപുഴകി വീണത്. ഷീറ്റുമേഞ്ഞ ഭാഗത്തിന് കാര്യമായ നാശം ഉണ്ടായി. പ്രദേശത്ത് പലയിടത്തും മരങ്ങൾ വീണതിനാൽ ഇന്നലെ വൈകുന്നേരം മുതൽ ഇവിടെ വൈദ്യുതി ബന്ധവും തകരാറിലാണ്.