മുഖ്യമന്ത്രി പിണറായി വിജയൻ ധർമ്മടത്ത് പത്രിക സമർപ്പിച്ചു

കണ്ണൂർ: ധർമടം മണ്ഡലത്തിലെ ആദ്യത്തെ പ്രതിക സമർപ്പണം നടത്തി പിണറായി വിജയൻ. പതിനൊന്ന് മണിയോടെ തലശ്ശേരി സബ് റജിസ്ട്രാർ ഓഫിസിൽ എത്തി റിട്ടേണിങ് ഓഫിസർ സച്ചിൻ കൃഷ്ണയ്ക്ക് മുമ്പാകെയാണ് പത്രിക സമർപ്പിച്ചത്. സ്പീക്കർ എ.എൻ. ഷംസീർ, സി.പി.എം കേന്ദ്ര കമ്മിറ്റി അംഗം ഇ.പി. ജയരാജൻ, ജില്ലാ സെക്രട്ടറി കെ.കെ. രാഗേഷ്, പി. ശശി തുടങ്ങിയവർ മുഖ്യമന്ത്രിക്ക് ഒപ്പമുണ്ടായിരുന്നു. 15 മിനിറ്റുകൊണ്ട് നടപടികൾ പൂർത്തിയാക്കി മുഖ്യമന്ത്രി മടങ്ങി. പിണറായി വിജയൻ ധർമടത്ത് മത്സരിക്കുന്നത് ഇത് മൂന്നാം തവണയാണ്. ഇതിനുമുമ്പ് അദ്ദേഹം കൂത്തുപറമ്പിൽ മൂന്ന് തവണയും തളിപ്പറമ്പിൽ ഒരു തവണയും മത്സരിച്ചിട്ടുണ്ട്. യൂത്ത് കോൺഗ്രസ് സംസ്ഥാന ജനറൽ സെക്രട്ടറിയായ വി.പി. അബ്ദുൽ റഷീദാണ് ധർമടത്ത് യു.ഡി.എഫ് സ്ഥാനാർഥിയായി മത്സരിക്കുന്നത്.