വൈക്കം: മൂത്തേടത്ത്കാവ് ഭഗവതി ക്ഷേത്രത്തിലെ ഉത്സവത്തിന് ഞായറാഴ്ച വൈകിട്ട് കൊടിയേറി. ക്ഷേത്രം തന്ത്രി മോനാട്ട് ഇല്ലത്ത് കൃഷ്ണന്‍ നമ്പൂതിരിയുടെ മുഖ്യകാര്‍മ്മികത്വത്തില്‍ മോനാട്ട്മന ഗോവിന്ദന്‍ നമ്പൂതിരി കൊടിയേറ്റി. ഊരാഴ്മ ഇല്ലക്കാരായ ഇണ്ടംതുരുത്തിമന നീലകണ്ഠന്‍ നമ്പൂതിരി, മുരിങ്ങൂര്‍മന വിഷ്ണു നമ്പൂതിരി, ഇണ്ടംതുരുത്തി വി. മുരളീധരന്‍ നമ്പൂതിരി, ക്ഷേത്രം മുഖ്യകാര്യദര്‍ശി ഇണ്ടംതുരുത്തി ഹരിഹരന്‍ നമ്പൂതിരി, ആനത്താനത്ത് എ.ജി. വാസുദേവന്‍ നമ്പൂതിരി എന്നിവരും കാര്‍മ്മികരായിരുന്നു. മേല്‍ശാന്തി ജയചന്ദ്രന്‍ പോറ്റി സഹകാര്‍മ്മികനായിരുന്നു. ക്ഷേത്രം മാനേജര്‍ വി.കെ ഗോപാലകൃഷ്ണന്‍ നായര്‍, ആര്‍.സാഗര്‍, എ.എസ് ധനഞ്ജയന്‍ എന്നിവര്‍ നേതൃത്വം നല്‍കി. ഉത്സവാഘോഷത്തിലെ പ്രധാന ചടങ്ങായ മൂത്തേടത്ത്കാവിലമ്മയുടെ കൂടിപ്പൂജ എഴുന്നള്ളിപ്പ് 22ന് നടക്കും. 24ന് ആറാട്ട്, ആറാട്ട് വരവ്, മേജര്‍സെറ്റ് പഞ്ചവാദ്യം, വലിയകാണിക്ക, വെടിക്കെട്ട്, തീയാട്ട് എന്നിവ പ്രധാന ചടങ്ങുകളാണ്. എപ്രില്‍ 15ന് വിഷുക്കണി ദര്‍ശനം, വില്‍പ്പാട്ട്, എരിതേങ്ങ തിരികൊളുത്തല്‍, തെക്കുപുറത്ത് വലിയ ഗുരുതി, വലിയതീയാട്ട്, അരിയേറ് എന്നിവയും പ്രധാന ചടങ്ങുകളാണ്. അരിയേറിന് ശേഷം മൂന്ന്മാസം ദേവി മധുരാപുരിയിലേക്ക് പുറപ്പെട്ടെന്ന സങ്കല്‍പ്പത്തില്‍ മൂന്നുമാസക്കാലം നിത്യപൂജകള്‍ പോലും നടത്താതെ നടയടച്ച് ഇടുന്ന സമ്പ്രദായമാണ് മൂത്തേടത്തുകാവിലേത്.