നഗരത്തിലെ ഗതാഗത കുരുക്കുക്കിനെതിരെ പ്രമേയം അവതരിപ്പിച്ചു

വൈക്കം: വൈക്കം വലിയ കവല -ഉദയനാപുരം റോഡിലെ ഗതാഗത കുരുക്കും അപകടസാധ്യതയും കുറക്കണം എന്ന ആവശ്യവുമായി വൈക്കം നഗരസഭ പ്രമേയം. വലിയകവല - ഉദയനാപുരം റോഡിൽ വൈപ്പിൻപടി കണിയാംതോട് ഭാഗങ്ങളിൽ ഗതാഗത കുരുക്കുമൂലം നിരന്തരം അപകടങ്ങൾ ഉണ്ടാകുന്ന സാഹചര്യത്തിലാണ് നഗരസഭ കൗൺസിൽ യോഗം പ്രമേയത്തിലൂടെ പൊതുമരാമത്ത് വകുപ്പിനോട് നടപടി ആവശ്യപ്പെട്ടത്. സ്ത്രീകളും കുട്ടികളുമാണ് ഇതിൻ്റെ ദുരിതം മുഴുവൻ അനുഭവിക്കുന്നത്. റോഡ് മുറിച്ചു കടക്കാൻ പോലും ജനങ്ങൾക്ക് സാധിക്കുന്നില്ല. റോഡും ഗ്രൗണ്ടും തമ്മിലുള്ള ഉയരവ്യത്യാസം അപകടങ്ങൾ കൂടുന്നതിന് കാരണമായിട്ടുണ്ട്. അതുപോലെ മഴക്കാലത്ത് കാളികുളം ഭാഗത്ത് ഉണ്ടാകുന്ന രൂക്ഷമായ വെള്ളക്കെട്ട് ശാശ്വതമായി പരിഹരിക്കണമെന്നുമാണ് പ്രമേയത്തിലെ ആവശ്യം. നഗരസഭ ചെയർമാൻ അബ്ദുൾസലാം റാവുത്തർ അദ്ധ്യക്ഷത വഹിച്ച കൗൺസിലിൽ ഇടവട്ടം ജയകുമാർ അവതരിപ്പിച്ച പ്രമേയം വൈസ് ചെയർമാൻ സൗദാമിനി അഭിലാഷ് ആണ് പിൻതാങ്ങിയത്.