വൈക്കം: മറവൻതുരുത്തിൽ കുട്ടികൾക്കായി സൗജന്യ യോഗ പരിശീലനം ആരംഭിച്ചു. ഈ മാസം 30 വരെ രാവിലെ 8:30 മുതൽ 9:30 വരെയാണ് യോഗപരിശീലനം നൽകുന്നത്. അവധിക്കാലത്ത് കുട്ടികളുടെ ശാരീരിക-മാനസിക ആരോഗ്യം മെച്ചപ്പെടുത്തുക എന്ന ലക്ഷ്യത്തോടെ മറവൻതുരുത്ത് പഞ്ചായത്തും, സർക്കാർ ആയുർവ്വേദ ആശുപത്രിയും, ആയുഷ് ഹെൽത്ത് ആൻഡ് വെൽനസ് സെന്ററും സംയുക്തമായാണ് കുട്ടികൾക്കുള്ള സൗജന്യ യോഗ പരിശീലനം സംഘടിപ്പിച്ചത്.പഞ്ചായത്ത് ഹാളിൽ നടന്ന പരിശീലന പരിപാടിയുടെ ഉദ്ഘാടനം മറവൻതുരുത്തു പഞ്ചായത്ത് പ്രസിഡൻ്റ് ആരതി വിനയൻ നിർവഹിച്ചു. ​ആരോഗ്യ സ്റ്റാൻഡിങ് കമ്മിറ്റി ചെയർമാൻ കെ.എസ്. വേണുഗോപാൽ അധ്യക്ഷത വഹിച്ചു. പഞ്ചായത്തംഗം വനജ അനിൽകുമാർ, ഗവ. ആയുർവേദാശുപത്രി മെഡിക്കൽ ഓഫീസർ ഡോ. മനു ആർ. മംഗലത്ത്, ആയുഷ് മിഷൻ യോഗ പരിശീലക ആർ. ശാലിനി എന്നിവർ പ്രസംഗിച്ചു.