ഉദയനാപുരം: ഉദയനാപുരം പഞ്ചായത്തിൽ നാല് ഏക്കർ നിലം പാട്ടത്തിന് എടുത്ത് വിജയകരമായി മത്സ്യ കൃഷി നടത്തുന്ന കർഷകന് ആദരം. പനമ്പുകാട് തരിശായി കിടന്ന നിലത്ത് ആറ് വർഷമായി കരിമീൻ കൃഷി നടത്തുന്ന കണ്ടത്തിൽ കെ.എം ഷാജിയെ ആണ് ഉദയനാപുരം പഞ്ചായത്ത് ആദരിച്ചത്. ദേശീയ മത്സ്യ കർഷക ദിനത്തിലായിരുന്നു പഞ്ചായത്ത് പ്രസിഡൻ്റ് കെ.ജി രാജുവിന്റെ നേതൃത്വത്തിൽ ഷാജിയെ ആദരിച്ചത്. വികസന കാര്യ സ്റ്റാൻഡിംഗ് കമ്മറ്റി ചെയർമാൻ കെ. ദീപേഷ്, ബ്ലോക്ക് പഞ്ചായത്ത് അംഗം രഞ്ജനാ സുനിൽ, ജനപ്രതിനിധികളായ ജസീനാ ഷാജുദ്ദീൻ, അജിതാ മധുകുട്ടൻ, അഭിജിത്ത് ചായപ്പള്ളി, ഗീതാ ഷാജി, സൗമ്യാ സനീഷ് എന്നിവരും ആദരിക്കൽ ചടങ്ങിനായി കർഷകന്റെ വീട്ടിലെത്തിയിരുന്നു.