ഉല്ലല ഓംകാരേശ്വരം ക്ഷേത്രത്തിൽ ഉത്സവം തുടങ്ങി

വൈക്കം: ഉല്ലല ഓംകാരേശ്വരം ക്ഷേത്രത്തിലെ കുംഭ ഭരണി മഹോത്സവം കലശാഭിഷേകം, കലശ എഴുന്നള്ളിപ്പ് ചടങ്ങുകളോടെ തുടങ്ങി. കൊടിയേറി ഉത്സവം തുടങ്ങുന്നതിനു പകരം കലശം എഴുന്നള്ളിച്ച് ഉത്സവം തുടങ്ങുന്ന ആചാരമാണിവിടെ. ഇന്നലെ രാവിലെ തന്ത്രി ശിവനാരായണ തീര്‍ത്ഥസ്വാമിയുടെ മുഖ്യ കാര്‍മ്മികത്വത്തില്‍ കലശപൂജയും, അഭിഷേകവും നടത്തി. മേല്‍ശാന്തിമാരായ വിഷ്ണു ശാന്തി, ശരത് ശാന്തി എന്നിവര്‍ സഹകാര്‍മ്മികരായിരുന്നു. തുടര്‍ന്ന് തന്ത്രിയും മേല്‍ശാന്തിമാരും ചേര്‍ന്ന് കലശം പുറത്തേയ്ക്ക് എഴുന്നള്ളിച്ചു. വാദ്യമേളങ്ങള്‍, മുത്തുക്കുടകള്‍, നിറദീപങ്ങള്‍ എന്നിവ എഴുന്നള്ളിപ്പിന് ഭക്തി പകര്‍ന്നു. ദേവസ്വം പ്രസിഡന്റ് പി.വി. ബിനേഷന്‍, വൈസ് പ്രസിഡന്റ് കെ.എസ്. പ്രീജു, സെക്രട്ടറി കെ.വി. പ്രസന്നന്‍, വി.ഡി. സന്തോഷ്, ടി.പി. സുഖലാല്‍, എന്‍.എന്‍. പവനന്‍ എന്നിവര്‍ നേതൃത്വം നല്‍കി. 117 ഉല്ലല, 118 കൊതവറ, 120 തലയാഴം, 1344 തലയാഴം വടക്കേകര, 1578 കൂവം ചേന്തുരുത്ത്, 2676 തലയാഴം ഈസ്റ്റ് എന്നീ എസ്.എന്‍.ഡി.പി. ശാഖാ യോഗങ്ങളുടെ നേതൃത്വത്തിലാണ് ഉത്സവം ആഘോഷിക്കുന്നത്. ഉത്സവത്തോടനുബന്ധിച്ച് 23 ന് വൈകിട്ട് നടക്കുന്ന ശ്രീനാരായണ കണ്‍വെന്‍ഷന്‍ ഹൈക്കോടതി ജഡ്ജി എന്‍. നഗരേഷ് ഉദ്ഘാടനം ചെയ്യും. ദേവസ്വം പ്രസിഡന്റ് പി.വി. ബിനേഷ് അദ്ധ്യക്ഷത വഹിക്കും. എസ്.എന്‍. ട്രസ്റ്റ് ബോര്‍ഡ് മെമ്പര്‍ പ്രീതി നടേശന്‍ അനുഗ്രഹ പ്രഭാഷണം നടത്തും.