ഉല്ലല പുതിയകാവ് ദേവീക്ഷേത്രത്തില്‍ കുംഭ ഭരണി ഉത്സവത്തിന് കൊടിയേറി
വൈക്കം: ഉല്ലല പുതിയകാവ് ദേവീക്ഷേത്രത്തിലെ കുംഭ ഭരണി മഹോത്സവത്തിന് ബുധനാഴ്ച രാവിലെ തന്ത്രി കാശാങ്കോടത്ത് സുനേഷന്‍ നമ്പൂതിരി കൊടിയേറ്റി. നിറദീപങ്ങളും, വായ്ക്കുരവകളും, വാദ്യമേളങ്ങളും, നെറ്റിപ്പട്ടം കെട്ടിയ ഗജവീരനും ചടങ്ങിന് ഭക്തി പകര്‍ന്നു. കൊടിയേറ്റിനു മുന്നോടിയായി ഭക്തര്‍ ക്ഷേത്രത്തില്‍ ചുറ്റ് വിളക്ക് തെളിയിച്ചു. കൊടിയേറ്റാനുള്ള കൊടിക്കയര്‍ ചൊവ്വാഴ്ച വൈകിട്ട് വഴിപാടായി സമര്‍പ്പിച്ചു. കൊടിയേറ്റ് ചടങ്ങിന് ജി. ശ്രീജിത്ത് നമ്പൂതിരി, കെ.കെ. സുബ്ബരായന്‍, മേല്‍ശാന്തി കേശവന്‍ ഭട്ടതിരിപാട്, ശബരിമല മുന്‍ മേല്‍ശാന്തി പി.ജെ. നാരായണന്‍ നമ്പൂതിരി എന്നിവര്‍ സഹകാര്‍മ്മികരായിരുന്നു. ക്ഷേത്രം പ്രസിഡന്റ് ജി. സുരേഷ് ബാബു, ദേവസ്വം മാനേജര്‍ കെ. കൃഷ്ണകുമാര്‍, വൈസ് പ്രസിഡന്റ് എസ്. കൃഷ്ണകുമാര്‍, അസിസ്റ്റന്റ് മാനേജര്‍ രതീഷ് കുമാര്‍, ട്രഷറര്‍ വി. മനോജ്, സെക്രട്ടറി കെ.ടി. സത്യനാഥ് പണിക്കര്‍ എന്നിവര്‍ നേതൃത്വം നല്‍കി. ഉത്സവാഘോഷത്തിന്റെ പ്രധാന ചടങ്ങായ കുംഭ ഭരണി ദര്‍ശനം, തിരു ആറാട്ട്, ആറാട്ടെഴുന്നള്ളിപ്പ്, പാണ്ടിമേളം, പഞ്ചാരിമേളം, ചുറ്റ് വിളക്ക്, നിറപറ, എതിരേല്‍പ്പ് എന്നിവ 23 ന് നടക്കും.
Comments ()