വൈക്കം: വൈക്കം അർബൻ സഹകരണ ബാങ്കിൻ്റെ ശതാബ്ദി ആഘോഷത്തിന് തുടക്കമാവുന്നു.

ഞായറാഴ്ച ശതാബ്ദി മന്ദിര നിർമ്മാണത്തിന്റെ ശിലാസ്ഥാപനവും നടക്കും. 1926ൽ കെട്ട് തെങ്ങ് സംഘം ആയി പ്രവർത്തനമാരംഭിച്ച് 1980 ലാണ് വൈക്കം അർബൻ കോപ്പറേറ്റീവ് ബാങ്ക് ലിമിറ്റഡ് ആയി മാറിയത്. സംഘത്തിൻ്റെ ആദ്യ പ്രസിഡന്റായിരുന്ന തെക്കേടത്ത് കെ.വി. നാരായണപിള്ളയുടെ സ്മാരകമായാണ് ശതാബ്ദി മന്ദിരം നിർമ്മിക്കുന്നത്. ഒരു വർഷം നീണ്ടുനിൽക്കുന്ന ശതാബ്ദി ആഘോഷ പരിപാടികൾക്കാണ് ഞായറാഴ്ച തുടക്കം കുറിക്കുന്നത്. വൈകിട്ട് മൂന്ന് മണിക്ക് ശതാബ്ദി ആഘോഷ സമ്മേളനം ജസ്റ്റിസ് എസ്. മനു ഉദ്ഘാടനം ചെയ്യും. ശതാബ്ദി മന്ദിരത്തിന്റെ ശിലാസ്ഥാപനം കണ്ണൻ ഗോപിനാഥ് ഐ.എ.എസ് നിർവഹിക്കും. സെൻറർ ഫോർ സോഷ്യൽ സയൻസ് റിസർച്ച് ഡയറക്ടർ മേരി ജോർജ് മുഖ്യ'പ്രഭാഷണം നടത്തും. നഗരസഭ ചെയർമാൻ അബ്ദുൾ സലാം റാവുത്തർ, സർക്കിൾ കോപ്പറേറ്റീവ് യൂണിയൻ ചെയർമാൻ ടി.സി വിനോദ്, ജോയിൻറ് ഡയറക്ടർ ജയമ്മ പോൾ, അസിസ്റ്റൻറ് ഡയറക്ടർ ഡി.എസ്.പ്രിയ തുടങ്ങിയവർ പങ്കെടുക്കും. ശതാബ്ദി ആഘോഷത്തിൻ്റെ ഭാഗമായി ക്യാൻസർ രോഗികളെ സഹായിക്കുന്നതിനുള്ള പദ്ധതി, കുട്ടികൾക്ക് ചിത്രരചന മത്സരം, സഹകരണ മേഖലയെ പറ്റി ബോധവൽക്കരണം നടത്തുന്നതിന് വേണ്ടിയുള്ള സെമിനാറുകൾ തുടങ്ങിയവ സംഘടിപ്പിക്കുമെന്ന് ബാങ്ക് ഭാരവാഹികൾ പത്രസമ്മേളനത്തിൽ അറിയിച്ചു. ബാങ്ക് പ്രസിഡൻ്റ് വി.എസ്. കുമാർ, വൈസ് ചെയർമാൻ ബി. അനിൽകുമാർ, മാനേജിങ് ഡയറക്ടർ വി. സുരേഷ്, ജനറൽ മാനേജർ വി. ജയലക്ഷമി എന്നിവരെ കൂടാതെ ഭരണസമിതി അംഗങ്ങളായ എൻ.സി. തോമസ്, ഷഡാനനൻ നായർ, ബി. ജയകുമാർ എന്നിവരും പത്രസമ്മേളനത്തിൽ പങ്കെടുത്തു.