വെച്ചൂർ പോലീസ് ഔട്ട് പോസ്റ്റിൽ 24 മണിക്കൂർ സേവനം വേണമെന്ന് ആവശ്യം

വൈക്കം: കല്ലറ പോലീസ് സ്റ്റേഷൻ പരിധിയിലായ വൈക്കം വെച്ചൂരിലെ പോലീസ്ഔട്ട് പോസ്റ്റിൽ 24 മണിക്കൂറും പോലീസിന്റെ സേവനം വേണമെന്ന ആവശ്യം ഉയരുന്നു. നിലവിൽ വെച്ചൂർ പഞ്ചായത്തിലാണ് ഔട്ട് പോസ്റ്റ് എങ്കിലും കല്ലറ പഞ്ചായത്തിലെ പോലീസ് സ്റ്റേഷൻ പരിധിയിലായി മാറിയിട്ടുണ്ട്. ഈ സാഹചര്യത്തിൽ വൈക്കം പോലീസ് സ്റ്റേഷൻ പരിധിയിലായിരുന്ന ഔട്ട് പോസ്റ്റ് ഭാഗങ്ങളിലേക്ക് പോലീസിന് എത്താൻ ദൂരം കൂടിയതല്ലാതെ മറ്റൊരു പ്രയോജനവും ഉണ്ടായിട്ടില്ല എന്നാണ് നാട്ടുകാരുടെ ആക്ഷേപം. അതുകൊണ്ടു തന്നെ എന്തെങ്കിലും അത്യാവശ്യം ഉണ്ടായാൽ കല്ലറയിൽ നിന്ന് പോലീസിന് ഇവിടെയെത്താൻ കൂടുതൽ സമയം ആവശ്യമായി വരും. ഈ സാഹചര്യത്തിൽ ഔട്ട് പോസ്റ്റിൽ രണ്ട് സി.പി.ഒ. മാരേയും രണ്ട് എസ്.ഐ.മാരെയും നിയമിച്ച് 24 മണിക്കൂർ സേവനം ഉറപ്പാക്കണമെന്നാണ് കേരള കോൺഗ്രസ് വെച്ചൂർ മണ്ഡലം കമ്മിറ്റി ആവശ്യപ്പെടുന്നത്.