വേമ്പനാട്ടു കായൽ നീന്തിക്കടക്കാൻ 63 വയസ്സുകാരി

വൈക്കം: വേമ്പനാട്ട് കായലിൽ ഒമ്പത് കിലോമീറ്റർ കുറുകെ നീന്താൻ ഒരു 63 വയസ്സുകാരി. കോതമംഗലം വരാപ്പെട്ടി മോളേൽ റുബി മത്തായി ആണ് അതിസാഹസികമായ നീന്തലിന് തയ്യാറെടുത്തത്. കായലിൽ വീതിയേറിയ ഭാഗത്തെ ഒമ്പത് കിലോമീറ്റർ കായൽ നീന്തുന്ന ഏറ്റവും പ്രായം കൂടിയ വനിതയാണ് റുബി മത്തായി എന്ന് സംഘാടകർ പറയുന്നു. ചുരുങ്ങിയ കാലയളവിൽ നീന്തലിൽ മികവ് കാണിച്ച റുബി മത്തായിയെ കോതമംഗലം ഡോൾഫിൻ അക്വാട്ടിക് പരിശീലകൻ ബിജു തങ്കപ്പനാണ് പരിശീലനം നൽകിയത്. കുത്തൊഴുക്കുള്ള മൂവാറ്റുപുഴയാറിലാണ് റുബി പരിശീലനം നടത്തിയത്. വേമ്പനാട് കായലിൽ ആലപ്പുഴ ജില്ലയിലെ ചേർത്തല കുമ്പേൽ കടവിൽ നിന്നും കോട്ടയം ജില്ലയിലെ വൈക്കം ബീച്ച് വരെ ഒമ്പത് കിലോമീറ്റർ ആണ് ശനിയാഴ്ച നീന്തുന്നത്. ഡോൾഫിൻ അക്വാട്ടിക് ക്ലബ്ബിന്റെ നേതൃത്വത്തിൽ വേമ്പനാട്ട് കായൽ കുറുകെ സാഹസിക നീന്തൽ നടത്തുന്ന 33-മത്തെ താരമാണ് റുബി.