വലയ സൂര്യഗ്രഹണം നാളെ

വൈക്കം: ഈ വർഷത്തെ ആദ്യത്തെ സൂര്യഗ്രഹണം നാളെ. വലയ സൂര്യഗ്രഹണമാണ് നാളെ ദൃശ്യമാകുന്നത്. ചന്ദ്രൻ സൂര്യനെ പൂർണ്ണമായും മറയ്ക്കാതെ വരുമ്പോൾ സൂര്യൻ ഒരു സ്വർണ്ണ വളയം പോലെ കാണപ്പെടുന്ന പ്രതിഭാസമാണിത്. ഇതിനെ 'അഗ്നിവലയം'എന്നും വിളിക്കുന്നു. ഇന്ത്യൻ സമയം ഉച്ചകഴിഞ്ഞ് 3:26-ന് ആരംഭിച്ച് വൈകുന്നേരം 7:57-ന് അവസാനിക്കും. വൈകുന്നേരം 5:42-ഓടെ സൂര്യൻ ഒരു തിളങ്ങുന്ന വളയമായി ദൃശ്യമാകും. ഈ ഗ്രഹണം ഇന്ത്യയിൽ ദൃശ്യമാകില്ല. അന്റാർട്ടിക്ക, ദക്ഷിണാഫ്രിക്കയുടെ ചില ഭാഗങ്ങൾ, തെക്കേ അമേരിക്കയുടെ തെക്കേ അറ്റം എന്നിവിടങ്ങളിലാണ് കാണാൻ സാധിക്കുക.