ആർ.സുരേഷ്ബാബു

വൈക്കം: വൈക്കത്തഷ്ടമിക്ക് കൊടികയറുവാൻ ഇനി മണികൂറുകൾ മാത്രം. അറ്റകുറ്റപ്പണികൾ നടത്താതെ ക്ഷേത്രത്തിലെ പത്തായപ്പുര. ഓടുകളും പട്ടികയും അടർന്ന് വഴിയാത്രക്കാരുടെ തലയിലും വീഴാം. ക്ഷേത്രത്തിന്റെ തെക്കേനടയിൽ നിന്നും പടിഞ്ഞാറെനടയിലേക്ക് വരുന്ന ആദ്യ വളവിൽ റോഡിനോട് ചേർന്ന പത്തായപ്പുരയുടെ കഴുക്കോലുകളും പട്ടികയും ഒടിഞ്ഞും ഓടുകൾ ഇളകി താഴെ വീഴാറായ നിലയിലാണ്. ചേർത്തല, കുമരകം ഭാഗത്തു നിന്നും വരുന്ന നിരവധി വാഹനങ്ങളും ഇരുചക്ര വാഹന യാത്രക്കാർ ഉൾപ്പടെയുള്ളവരും കാൽ നടയാത്രക്കാരും ഈ ഭാഗത്തുകൂടി ജീവൻ പണയം വച്ചാണ് യാത്ര ചെയ്യുന്നത്. വൺവേ നിലവിലുള്ള റോഡിൽ അത് ലംഘിച്ച് ഇതുവഴി വരുന്ന വലിയ വാഹനങ്ങളുടെ മുകൾ ഭാഗം തട്ടിയതാണ് കഴുക്കോലുംലും പട്ടികയും ഒടിയുവാനും ഓടുകൾ ഇളകി വീഴുവാനും ഇടയായത്.