ഇടുക്കി ആർച്ച് ഡാം ഇനി കാൽനടയായി സന്ദർശിക്കാം!

​വൈക്കം: ഇടുക്കി ഡാമിലെത്തുന്ന സഞ്ചാരികൾക്ക്  സന്തോഷ വാർത്ത. ഇനി മുതൽ ഇടുക്കി ആർച്ച് ഡാം കാൽനടയായി നടന്നു കാണാൻ പൊതുജനങ്ങൾക്ക് അനുമതിയായി. ജലവിഭവ വകുപ്പ് മന്ത്രി റോഷി അറസ്റ്റിൻ ആണ് കാൽനട യാത്രയ്ക്കുള്ള ടിക്കറ്റ് വിതരണോദ്ഘാടനം നിർവഹിച്ചത്.

​സഞ്ചാരികളുടെ വർധനവും എല്ലാവർക്കും ഡാം കാണാൻ അവസരം ലഭിക്കണം എന്നതും പരിഗണിച്ചാണ് ഈ സുപ്രധാന തീരുമാനം എടുത്തത്. കർശനമായ സുരക്ഷാ മാനദണ്ഡങ്ങൾ  പാലിച്ചായിരിക്കും സന്ദർശനം അനുവദിക്കുക.

• ​സന്ദർശന സമയം: ദിവസവും രാവിലെ 10:00 മുതൽ വൈകിട്ട് 3:30 വരെയാണ് പ്രവേശനം.
• ​കാൽനട യാത്രയുടെ ടിക്കറ്റ് നിരക്ക്: മുതിർന്നവർക്ക് 50 രൂപയും കുട്ടികൾക്ക് 30 രൂപയുമാണ് നിരക്ക്.
• ​ബഗ്ഗി കാർ നിരക്ക്: നേരത്തെ ഉണ്ടായിരുന്ന ബഗ്ഗി കാർ യാത്രയ്ക്ക് ഒരാൾക്ക് 150 രൂപയാണ് ടിക്കറ്റ് നിരക്ക്. ഇതിനായി 8 ബഗ്ഗി കാറുകൾ സജ്ജീകരിച്ചിട്ടുണ്ട്.

​ദിവസേന 3750 പേർക്കാണ് ഡാമിൽ സന്ദർശനാനുമതിയുള്ളത്.

• ​കാൽനട യാത്രയ്ക്കായി 2500 പേർക്ക് ഓൺലൈനായി ടിക്കറ്റ് ബുക്ക് ചെയ്യാം.
• ​ബഗ്ഗി കാർ സേവനം പ്രയോജനപ്പെടുത്തി 1248 പേർക്ക് ഡാം സന്ദർശിക്കാം.
• ​ഓൺലൈൻ ബുക്കിംഗിന് ശേഷം ഒഴിവുണ്ടെങ്കിൽ സ്പോട്ട് ടിക്കറ്റ് ലഭിക്കും  

​നിലവിൽ നവംബർ 30 വരെയാണ് സന്ദർശനാനുമതി നൽകിയിട്ടുള്ളത്.    www.keralahydeltourism.com എന്ന വെബ്സൈറ്റ് വഴി ടിക്കറ്റുകൾ ബുക്ക് ചെയ്യാം. ചെറുതോണി ഡാമിന്റെ പ്രവേശന കവാടത്തിന് സമീപം ടിക്കറ്റ് കൗണ്ടറും ഒരുക്കിയിട്ടുണ്ട്.

​വൈദ്യുതി വകുപ്പ് മന്ത്രി കെ. കൃഷ്ണൻകുട്ടി മറ്റ് ഉന്നത ഉദ്യോഗസ്ഥർ, ജനപ്രതിനിധികൾ എന്നിവരുമായി നടത്തിയ ചർച്ചകളുടെ ഫലമായാണ് മന്ത്രി റോഷി അഗസ്റ്റിൻ്റെ നിരന്തര ഇടപെടലിലൂടെ ഈ അനുമതി ലഭ്യമായത്.