ശമ്പള പരിഷ്കരണ കമ്മീഷൻ യാഥാർത്ഥ്യമായതിൽ ആഹ്ലാദപ്രകടനം നടത്തി

വൈക്കം: സർക്കാർ ജീവനക്കാരുടെയും അധ്യാപകരുടെയും പന്ത്രണ്ടാമത് ശമ്പള പരിഷ്കരണ കമ്മീഷൻ യാഥാർത്ഥ്യമായതിന് ആഹ്ളാദം പ്രകടിപ്പിച്ച് ആക്ഷൻ കൗൺസിൽ ഓഫ് സ്റ്റേറ്റ് എംപ്ലോയീസ് ആൻഡ് ടീച്ചേഴ്സിൻ്റെ നേതൃത്വത്തിൽ അധ്യാപകരും ജീവനക്കാരും ജില്ലാ താലൂക്ക് കേന്ദ്രങ്ങളിൽ പ്രകടനം നടത്തി. വൈക്കം മുൻസിപ്പാലിറ്റിക്ക് മുൻപിൽ നിന്നും ആരംഭിച്ച പ്രകടനം വൈക്കം മിനി സിവിൽ സ്റ്റേഷന് മുന്നിൽ സമാപിച്ചു. തുടന്ന് നടന്ന യോഗം കെ.ജി.ഒ.എ സംസ്ഥാന ജനറൽ സെക്രട്ടറി എ.ഷാജഹാൻ ഉദ്ഘാടനം ചെയ്തു. കെ.ജി.ഒ.എ സംസ്ഥാന പ്രസിഡൻ്റ് ഡോ. എസ്.ആർ. മോഹനചന്ദ്രൻ, കെ.എസ്.ടി.എ ജില്ലാ സെക്രട്ടറി ടി. രാജേഷ്, കെ.ജി.ഒ.എ ജില്ലാ സെക്രട്ടറി അജിമോൻ ടി.എസ്, കേരള എൻ.ജി.ഒ യൂണിയൻ ജില്ലാ സെക്രട്ടറിയേറ്റംഗം വി.കെ. വിപിനൻ എന്നിവർ സംസാരിച്ചു.