തലയോലപ്പറമ്പ് സി.എച്ച്.സിയിൽ ഓണാഘോഷം സംഘടിപ്പിച്ചു

തലയോലപ്പറമ്പ്: രോഗീപരിചരണവും കൃത്യനിർവഹണവും തടസ്സപ്പെടുത്താതെ സ്നേഹത്തിന്റെയും കൂട്ടായ്മയുടെയും സന്ദേശമോതി തലയോലപ്പറമ്പ് സാമൂഹിക ആരോഗ്യ കേന്ദ്രത്തിൽ ഓണാഘോഷ പരിപാടികൾ സംഘടിപ്പിച്ചു.
ഡോക്ടർമാർ, നേഴ്സുമാർ, മറ്റ് ജീവനക്കാർ എന്നിവരെല്ലാം തനിമയാർന്ന കേരളീയ വേഷമണിഞ്ഞാണ് ആഘോഷങ്ങളിൽ പങ്കാളികളായത്.

പ്രവർത്തനങ്ങൾക്ക് തടസ്സമില്ലാത്ത വിധം ക്രമീകരിച്ച പരിപാടികളുടെ ഉദ്ഘാടനം മെഡിക്കൽ ഓഫീസർ ഡോ.ആർ. രേഖ നിർവഹിച്ചു. സ്റ്റാഫ് സെക്രട്ടറി വി.ടി. ലത അദ്ധ്യക്ഷത വഹിച്ചു. ജീവനക്കാർ ചേർന്നൊരുക്കിയ മനോഹരമായ പൂക്കളത്തോടെയാണ് ആഘോഷങ്ങൾക്ക് തുടക്കമായത്. തുടർന്ന് വിവിധ കലാ-കായിക മത്സരങ്ങളും ആവേശകരമായ വടംവലിയും നടന്നു. മത്സരങ്ങൾക്ക് ശേഷം വിപുലമായ ഓണസദ്യയും ഒരുക്കിയിരുന്നു.
ഷെറി തോമസ്, കെ.കെ. സജി, മോളിക്കുട്ടി മാത്യു, ബിന്ദു കെ. ജോസഫ്, അനന്തു ഉണ്ണി, ബിലാൽ, ജയൻ എന്നിവർ നേതൃത്വം നൽകി.