അച്ഛനും മകനും ഓണക്കോടി കൈമാറി; വൈക്കത്ത് ഭക്തിസാന്ദ്രമായി ഓണപ്പുടവ സമർപ്പണം​

വൈക്കം: അച്ഛൻ മകനും മകൻ അച്ഛനും ഓണക്കോടി സമ്മാനിക്കുന്ന അപൂർവ്വവും ഭക്തിസാന്ദ്രവുമായ ആചാരത്തിന് വൈക്കം സാക്ഷ്യം വഹിച്ചു. ഉത്രാടദിനത്തെ വരവേൽക്കാൻ പിതാവായ വൈക്കത്തപ്പനും പുത്രനായ ഉദയനാപുരത്തപ്പനും പരസ്പരം ഓണപ്പുടവകൾ സമർപ്പിക്കുന്ന ചടങ്ങ് ആചാരപൂർവ്വം നടന്നു.​ വൈക്കം മഹാദേവ ക്ഷേത്രത്തിൽ ഉദയനാപുരം സബ് ഗ്രൂപ്പ് ഓഫീസർ രാഹുൽ രാധാകൃഷ്ണനും, ഉദയനാപുരം സുബ്രഹ്മണ്യസ്വാമി ക്ഷേത്രത്തിൽ വൈക്കം ദേവസ്വം അഡ്മിനിസ്ട്രേറ്റീവ് ഓഫീസർ വി. അയ്യപ്പനുമാണ് ഭഗവാന് വേണ്ടിയുള്ള ഓണപ്പുടവകൾ സമർപ്പിച്ചത്.

സോപാനത്ത് ഭക്തിപൂർവ്വം സമർപ്പിച്ച ഈ പുടവകൾ വൈക്കം ക്ഷേത്രത്തിൽ മേൽശാന്തി തരണി ശ്രീധരൻ നമ്പൂതിരിയും, ഉദയനാപുരം ക്ഷേത്രത്തിൽ മേൽശാന്തി ആഴാട് ഉമേഷ് നമ്പൂതിരിയും ഏറ്റുവാങ്ങി. ഉത്രാട ദിനത്തിൽ പുലർച്ചെ 4 മണിക്കും 5.45 നും ഇടയിലുള്ള ശുഭമുഹൂർത്തത്തിലാകും ഇരു ക്ഷേത്രങ്ങളിലും ദേവൻമാർക്ക് ഈ ഓണപ്പുടവ ചാർത്തുക.