വൈക്കം ബീച്ചിൽ റേഡിയോ സംഗീതം ഉയർന്നുകേൾക്കും

വൈക്കം: ബീച്ചിൽ വീണ്ടും റേഡിയോ സംഗീതം ഉയരുന്നു. 'ഒരുമിച്ച് സേവിക്കാം, ഒരുമിച്ച് തിളങ്ങാം' എന്ന സന്ദേശവുമായി സമൂഹത്തിന്റെ ക്ഷേമത്തിനായുള്ള പ്രവർത്തനങ്ങളുടെ ഭാഗമായി വൈക്കം ടൗൺ റോട്ടറി ക്ലബ്ബ് ആണ് റേഡിയോ പുന: സ്ഥാപിച്ചത്. ബീച്ചിലെത്തുന്നവർക്ക് ഇനി എഫ്.എം വഴിയുള്ള ആവശ്യമായ അറിയിപ്പുകളും സുരക്ഷാ നിർദ്ദേശങ്ങളും ആരോഗ്യ–ശുചിത്വ ബോധവൽക്കരണ സന്ദേശങ്ങളും അറിയാം.

വൈക്കം നഗരസഭയുടെ സഹകരണത്തോടെയാണ് വൈക്കം ടൗൺ റോട്ടറി ക്ലബ് റേഡിയോ സ്ഥാപിക്കുന്നതിനുള്ള നടപടികൾ എടുത്തത്. കെ. ബിനിമോൻ എം.എൽ.എ ഓഡിയോ- റേഡിയോ സ്വിച്ച് ഓൺ ചെയ്തു. ടൗൺ റോട്ടറി ക്ലബ് പ്രസിഡൻ്റ് ഡോ. അനൂപ്കുമാർ രവീന്ദ്രനാഥ് അദ്ധ്യക്ഷത വഹിച്ചു.

നഗരസഭ ചെയർമാൻ അബ്ദുൾ സലാം റാവുത്തർ, റോട്ടറി അസിസ്റ്റൻ്റ് ഗവർണർ ടി.കെ. ശിവപ്രസാദ്, നഗരസഭ വൈസ് ചെയർപേഴ്സൺ സൗദാമിനി അഭിലാഷ്, കൗൺസിലർമാരായ ബി. രാജശേഖരൻ, അംബിക രാജേന്ദ്രൻ, മാധുരി, എം.ആർ. അനിൽകുമാർ, റോട്ടറി ക്ലബ് ഭാരവാഹികളായ അഡ്വ.പി.എ. സുധീരൻ, എൻ.കെ. സെബാസ്റ്റ്യൻ തുടങ്ങിയവർ പ്രസംഗിച്ചു. പരിപാടിയോടനുബന്ധിച്ച് വായയുടെ ആരോഗ്യ സംരക്ഷണത്തെക്കുറിച്ചുളള ബോധവൽക്കരണ ലഘുലേഖകളും ടൂത്ത് പേസ്റ്റും വിതരണം ചെയ്തു.