ഈസ്റ്റർ: അതിജീവനത്തിന്റെയും പ്രത്യാശയുടെയും തിരുനാൾ

“അവന്റെ മഹാകരുണയാൽ, യേശുക്രിസ്തുവിന്റെ മരിച്ചവരിൽ നിന്നുള്ള പുനരുത്ഥാനത്തിലൂടെ അവൻ നമ്മെ ജീവനുള്ള പ്രത്യാശയിലേക്ക് വീണ്ടും ജനിപ്പിച്ചിരിക്കുന്നു.”  (1പത്രോസ് 1:3)

​ലോകമെമ്പാടുമുള്ള ക്രൈസ്തവർ  സന്തോഷത്തോടെയും ഭക്തിയോടെയും ആഘോഷിക്കുന്ന മഹത്തായ തിരുനാളാണ് ഈസ്റ്റർ. മരണത്തിന്മേൽ ജീവിതം വിജയം വരിച്ചതിന്റെയും, ഇരുട്ടിന്മേൽ വെളിച്ചം ആധിപത്യം സ്ഥാപിച്ചതിന്റെയും പ്രതീകമാണിത്. കുരിശിലേറ്റപ്പെട്ട യേശുക്രിസ്തു മൂന്നാം നാൾ ഉയിർത്തെഴുന്നേറ്റതിന്റെ സ്മരണ പുതുക്കുന്ന ഈ ദിനം മനുഷ്യരാശിക്ക് മുഴുവൻ വലിയൊരു പ്രത്യാശയുടെ സന്ദേശമാണ് നൽകുന്നത്.

ഈസ്റ്ററിന് മുന്നോടിയായുള്ള നോമ്പ്  ആത്മപരിശോധനയുടെയും പ്രായശ്ചിത്തത്തിന്റെയും കാലമാണ്. ഓശാന ഞായർ മുതൽ തുടങ്ങുന്ന വിശുദ്ധ വാരം യേശുവിന്റെ കഷ്ടാനുഭവങ്ങളെയും അന്ത്യത്താഴത്തെയും കുരിശുമരണത്തെയും അനുസ്മരിപ്പിക്കുന്നു. ദുഃഖവെള്ളിയുടെ നിശബ്ദതയ്ക്ക് ശേഷമുള്ള ഈസ്റ്റർ ഞായർ, സന്തോഷത്തിന്റെയും സ്തുതിഗീതങ്ങളുടെയും പുലരിയാണ്. ജീവിതത്തിലെ തകർച്ചകളിൽ നിന്ന് പുതിയൊരു ഉദയമുണ്ടെന്ന് ഈസ്റ്റർ നമ്മെ പഠിപ്പിക്കുന്നു. മരണം അവസാനമല്ല, മറിച്ച് നിത്യജീവനിലേക്കുള്ള വാതിലാണെന്ന് ഈസ്റ്റർ നമ്മെ ഓർമ്മിപ്പിക്കുന്നു. ലോകത്തിന്റെ പാപങ്ങൾക്ക് വേണ്ടി സ്വയം ബലിയായി തീർന്ന യേശുദേവന്റെ അനന്തമായ സ്നേഹമാണ് ഈസ്റ്ററിൻ്റെ പൊരുൾ. ഉയിർത്തെഴുന്നേറ്റ യേശു തന്റെ ശിഷ്യന്മാർക്ക് നൽകിയ ആദ്യ സന്ദേശം "നിങ്ങൾക്ക് സമാധാനം" എന്നതായിരുന്നു. ആധുനിക ലോകത്ത് ഏറ്റവും കൂടുതൽ ആവശ്യമുള്ളതും ഈ സമാധാനമാണ്. 

ഈസ്റ്റർ കേവലം ഒരു മതപരമായ ചടങ്ങല്ല; മറിച്ച് അത് മനസ്സിലെ തിന്മകളെ വെടിഞ്ഞ് നന്മയിലേക്കും സ്നേഹത്തിലേക്കും മടങ്ങാനുള്ള ആഹ്വാനമാണ്. പീഡനങ്ങളും കഷ്ടപ്പാടുകളും നിറഞ്ഞ പാതകൾക്കൊടുവിൽ ഒരു ഉയിർത്തെഴുന്നേൽപ്പുണ്ടെന്ന വലിയ സത്യം ഈസ്റ്റർ നമുക്ക് പകർന്നു നൽകുന്നു. ഏവർക്കും സ്നേഹം നിറഞ്ഞ ഈസ്റ്റർ ആശംസകൾ!

ടീം വൈക്കംവാർത്ത