തിരുവനന്തപുരം: സംസ്ഥാനത്ത് യു.ഡി.എഫ് അധികാരത്തിൽ വന്നാൽ കെ.എസ്.ആർ.ടി.സി ബസുകളിൽ സ്ത്രീകൾക്ക് സൗജന്യയാത്ര അനുവദിക്കുമെന്ന 'ഇന്ദിര ഗ്യാരന്റി' പദ്ധതിക്കെതിരെ പ്രതിഷേധവുമായി സ്വകാര്യ ബസ് ഉടമകൾ രംഗത്ത്. പദ്ധതി നടപ്പിലാക്കിയാൽ കേരളത്തിലെ സ്വകാര്യ ബസ് വ്യവസായം പൂർണ്ണമായും തകരുമെന്നും വിഷയത്തിൽ സർക്കാർ അടിയന്തരമായി ചർച്ചയ്ക്ക് തയ്യാറാകണമെന്നും ബസുടമകളുടെ സംഘടനകൾ ആവശ്യപ്പെട്ടു.

ഉടമകളുടെ പ്രധാന ആശങ്കകൾ:

• യാത്രക്കാരുടെ കുറവ്: സ്വകാര്യ ബസുകളെ ആശ്രയിക്കുന്നവരിൽ 70 ശതമാനവും സ്ത്രീകളാണ്. ഇവർ കെ.എസ്.ആർ.ടി.സിയിലേക്ക് മാറിയാൽ സ്വകാര്യ ബസുകളിൽ യാത്രക്കാരില്ലാത്ത അവസ്ഥയുണ്ടാകും.
• സാമ്പത്തിക ബാധ്യത: കൺസെഷൻ നിരക്കിൽ യാത്ര ചെയ്യുന്ന വിദ്യാർത്ഥികളെ മാത്രം വഹിച്ച് സർവീസ് നടത്തുന്നത് പ്രായോഗികമല്ല. വൻതുക നികുതി നൽകുന്ന ഉടമകൾക്ക് ഇത് കനത്ത തിരിച്ചടിയാകും.
• പ്രാദേശിക വ്യത്യാസം: തമിഴ്‌നാട്, കർണാടക സംസ്ഥാനങ്ങളിൽ നിന്ന് വ്യത്യസ്തമായി കേരളത്തിൽ പൊതുഗതാഗതത്തിന് ഭൂരിഭാഗം പേരും ആശ്രയിക്കുന്നത് സ്വകാര്യ ബസുകളെയാണ്. പ്രത്യേകിച്ച് മലബാർ, മധ്യകേരളം മേഖലകളിൽ സ്വകാര്യ ബസുകളാണ് പ്രധാന യാത്രാ സൗകര്യം.

കെ.എസ്.ആർ.ടി.സിയിൽ സ്ത്രീകൾക്ക് സൗജന്യ യാത്ര നൽകിയാൽ, വിദ്യാർത്ഥികൾക്ക് വേണ്ടി മാത്രം സ്വകാര്യ ബസ് സർവീസ് നടത്തേണ്ടി വരുന്ന സാഹചര്യം ഉണ്ടാകും. സർക്കാർ ബസുടമകളുമായി ചർച്ചയ്ക്ക് തയ്യാറായി പ്രത്യേക പാക്കേജ് പ്രഖ്യാപിക്കണമെന്ന് ഓൾ കേരള ബസ് ഓപ്പറേറ്റേഴ്സ് ഓർഗനൈസേഷൻ ജനറൽ സെക്രട്ടറി ടി. ഗോപിനാഥൻ ആവശ്യപ്പെട്ടു.

വിദഗ്ധരുടെ നിരീക്ഷണം

അതേസമയം, പദ്ധതി സ്വകാര്യ ബസ് മേഖലയെ എല്ലായിടത്തും ഒരേപോലെ ബാധിക്കില്ലെന്ന് ഒരു വിഭാഗം വിദഗ്ധർ ചൂണ്ടിക്കാട്ടുന്നു. ഏറ്റവും കൂടുതൽ സ്വകാര്യ ബസുകളുള്ള മലബാർ മേഖലയിൽ കെ.എസ്.ആർ.ടി.സിയുടെ സാന്നിധ്യം പ്രധാനമായും ദീർഘദൂര-മലയോര സർവീസുകളിൽ മാത്രമാണ്. അതിനാൽ പ്രാദേശിക റൂട്ടുകളിൽ ഇത് വലിയ ആഘാതമുണ്ടാക്കില്ലെന്നാണ് ഇവരുടെ വിലയിരുത്തൽ.

മുന്നൊരുക്കങ്ങളുമായി സർക്കാർ

പദ്ധതിയുടെ മുന്നോടിയായി കെ.എസ്.ആർ.ടി.സി ടിക്കറ്റുകളിൽ യാത്രക്കാർ സ്ത്രീയാണോ പുരുഷനാണോ എന്ന് രേഖപ്പെടുത്തി തുടങ്ങിയിട്ടുണ്ട്. കർണാടക മോഡലിൽ ആദ്യ മന്ത്രിസഭാ യോഗത്തിൽ തന്നെ ഉത്തരവ് പുറത്തിറക്കാനാണ് യു.ഡി.എഫ് നീക്കം. എന്നാൽ, ഏകപക്ഷീയമായ തീരുമാനവുമായി മുന്നോട്ട് പോയാൽ ബസ് പണിമുടക്ക് ഉൾപ്പെടെയുള്ള കടുത്ത സമരമുറകളിലേക്ക് നീങ്ങുമെന്ന് ഉടമകളുടെ സംഘടനകൾ മുന്നറിയിപ്പ് നൽകി.