മറവൻതുരുത്ത്: അത്യപൂർവ രോഗ ബാധയെ തുടർന്ന് ഗുരുതരാവസ്ഥയിലായ പത്ത് മാസം പ്രായമുള്ള കുഞ്ഞിൻ്റെ ജീവൻ രക്ഷിക്കാനായി മാതാപിതാക്കൾ സുമനസുകളുടെ കനിവ് തേടുന്നതറിഞ്ഞ് ചലച്ചിത്രതാരം ബാല സഹായധനം നൽകി. പാലക്കാട് മേലാർകോട് കല്ലയിൽ ഭവനിൽ കെ.സന്തോഷ്, എസ്. ശാന്തിനി ദമ്പതികളുടെ പത്ത് മാസം പ്രായമുള്ള മകൾ എസ്. സാൻവിയാണ് അത്യപൂർവമായ ഡയമണ്ട് ബ്ലാക്ക് ഫാൻ അനീമിയ എന്ന രോഗം ബാധിച്ച് അവശനിലയിലായത്. ചലച്ചിത്രതാരം ബാലയുടെ സുഹൃത്തും
മറവൻതുരുത്ത് സ്വദേശിയുമായ അനൂപിനൊപ്പമാണ് സാൻവിയയുടെ കുടുംബം ബാലയുടെ ഉദയനാപുരം നേരെകടവിലുള്ള വസതിയിലെത്തിയത്.
വെല്ലൂർ ക്രിസ്ത്യൻ മെഡിക്കൽ കോളജ് ആശുപത്രിയിൽ രണ്ട് മാസമായി ചികിത്സ നടത്തിവരുന്ന സാൻവിയുടെ രോഗം മാറ്റാൻ മജ്ജ മാറ്റിവയ്ക്കൽ മാത്രമാണ് ഏക മാർഗമെന്നാണ് ആശുപത്രി അധികൃതർ പറയുന്നത്. ശസ്ത്രകിയയ്ക്കും തുടർ ചികിത്സയ്ക്കുമായി 30ലക്ഷത്തോളം രൂപ ചെലവ് വരും. കൂലിപണിക്കാരായ മാതാപിതാക്കൾക്ക് ഭാരിച്ച ചികിത്സാചെലവ് താങ്ങാൻ കഴിയുമായിരുന്നില്ല. ഇതേതുടർന്ന് പെരുമ്പാവൂർ കേന്ദ്രീകരിച്ച് പൊതുപ്രവർത്തകർ ഭാരവാഹികളായ
ജീവകാരുണ്യ സംഘടന ചികിത്സാ ധനസമാഹരണത്തിന് മുന്നോട്ടു വന്നു.
ഇവരുടെ കൂടി സാന്നിദ്ധ്യത്തിലാണ് ബാല കുഞ്ഞിൻ്റെ ചികിൽസയ്ക്കായുള്ള സഹായധനം മാതാപിതാക്കൾക്ക് കൈമാറിയത്.

ഫോട്ടോ:
അത്യപൂർവ രോഗ ബാധിതയായ
പത്ത് മാസം പ്രായമുള്ള എസ്.സാൻവിയുടെ ചികിത്സയ്ക്കായി ചലച്ചിത്ര നടൻ ബാല സഹായധനം നൽകിയപ്പോൾ