തമിഴ്‌നാട്ടിൽ വകുപ്പ് വിഭജനത്തിന് ഗവർണ്ണറുടെ അംഗീകാരം; സുപ്രധാന ചുമതലകൾ മുഖ്യമന്ത്രി വിജയ് കൈകാര്യം ചെയ്യും

ചെന്നൈ: തമിഴ്‌നാട്ടിൽ സി. ജോസഫ് വിജയ് മന്ത്രിസഭയിലെ വകുപ്പ് വിഭജനത്തിന് ഗവർണ്ണർ ഔദ്യോഗികമായി അംഗീകാരം നൽകി. ഭരണത്തിലെ ഏറ്റവും നിർണ്ണായകവും സുപ്രധാനവുമായ പൊതുഭരണം, ആഭ്യന്തരം, പോലീസ്, നഗരസഭ ഭരണം, വനിതാ-യുവജന ക്ഷേമം എന്നീ വകുപ്പുകൾ മുഖ്യമന്ത്രി വിജയ് തന്നെയാണ് കൈകാര്യം ചെയ്യുന്നത്. മുതിർന്ന രാഷ്ട്രീയ നേതാവായ കെ.എ. സെങ്കോട്ടയ്യനാണ് പുതിയ ധനകാര്യ മന്ത്രിയായി ചുമതലയേറ്റിരിക്കുന്നത്. ധനകാര്യത്തിന് പുറമെ പെൻഷൻ വകുപ്പിന്റെ ചുമതലയും അദ്ദേഹം വഹിക്കും.

​പാർട്ടിയുടെ ജനറൽ സെക്രട്ടറിയായ എൻ. ആനന്ദിന് ഗ്രാമവികസനം, പഞ്ചായത്തുകൾ, ദാരിദ്ര്യനിർമ്മാർജ്ജനം, ജലവിഭവം, ജലസേചനം എന്നീ നിർണ്ണായക വകുപ്പുകളാണ് അനുവദിച്ചിരിക്കുന്നത്. തിരഞ്ഞെടുപ്പ് പ്രചാരണ ചുമതലയുണ്ടായിരുന്ന മറ്റൊരു ജനറൽ സെക്രട്ടറിയായ ആദവ് അർജുന ഇനി മുതൽ പൊതുമരാമത്ത്, കെട്ടിടങ്ങൾ, ദേശീയപാതകൾ, ചെറുകിട തുറമുഖങ്ങൾ, കായിക വികസനം എന്നീ വകുപ്പുകളുടെ ചുമതല നോക്കും. പാർട്ടിയുടെ ജോയിന്റ് ജനറൽ സെക്രട്ടറിയായ സി.ടി.ആർ. നിർമ്മൽ കുമാറിനാണ് ഊർജ്ജം, വൈദ്യുതി, നിയമം, കോടതികൾ, ജയിലുകൾ, അഴിമതി നിരോധനം, നിയമസഭ, തെരഞ്ഞെടുപ്പ്, പാസ്‌പോർട്ട് എന്നീ പ്രധാന വകുപ്പുകൾ നൽകിയിരിക്കുന്നത്.

​വിദ്യാഭ്യാസ, സാംസ്കാരിക മേഖലകളുടെ ചുമതല രാജ്മോഹനായിരിക്കും. സ്കൂൾ വിദ്യാഭ്യാസം, പുരാവസ്തു വകുപ്പ്, തമിഴ് ഔദ്യോഗിക ഭാഷയും സംസ്കാരവും, വിവര-പൊതുജനസമ്പർക്കം, സിനിമ, അച്ചടി-സ്റ്റേഷനറി എന്നീ വകുപ്പുകളാണ് അദ്ദേഹം കൈകാര്യം ചെയ്യുക. മുൻ ഐ.ആർ.എസ് ഉദ്യോഗസ്ഥനും പ്രചാരണ സെക്രട്ടറിയുമായ ഡോ. കെ.ജി. അരുൺരാജ് ആരോഗ്യം, മെഡിക്കൽ വിദ്യാഭ്യാസം, കുടുംബക്ഷേമം എന്നീ വകുപ്പുകളുടെ മന്ത്രിയാകും. പാർട്ടിയുടെ ട്രഷററായ പി. വെങ്കിട്ടരാമന് ഭക്ഷ്യം, പൊതുവിതരണം, ഉപഭോക്തൃ സംരക്ഷണം, വിലനിയന്ത്രണം എന്നീ വകുപ്പുകളുടെ ചുമതലയും നൽകിയിട്ടുണ്ട്.