ഉദയനാപുരത്ത് റോഡിന്റെ കൽക്കെട്ട് തോട്ടിലേക്ക് ഇടിഞ്ഞുവീണു

വൈക്കം: ഉദയനാപുരത്ത് കനത്ത മഴയെ തുടർന്ന് റോഡരികിലെ കൽക്കെട്ട് കഴിഞ്ഞ ദിവസം തോട്ടിലേയ്ക്കിടിഞ്ഞു വീണു. ഉദയനാപുരം നേരേകടവ് റോഡിലെ മാടവന കലുങ്കിനോട് ചേർന്നുള്ള റോഡിൻ്റെ കൽക്കെട്ടാണ് അഞ്ചുമീറ്ററോളം ഇടിഞ്ഞു തോട്ടിലേക്ക് വീണത്. നേരകടവ്- മാക്കേക്കടവ് ചങ്ങാട സർവീസിലേക്ക് ഇരുചക്ര വാഹനങ്ങളടക്കം നിരവധി വാഹനങ്ങളും സ്കൂൾ വാനുകളും കടന്നുപോകുന്ന വഴിയിലാണ് ഈ അപകടാവസ്ഥ. മഴ തുടരുന്നതിനാൽ റോഡ് കൂടുതൽ ഇടിയാൻ സാധ്യതയേറെയാണെന്ന് നാട്ടുകാർ പറയുന്നു. തുറവൂർ പമ്പ ഭാഗമായി വരുന്ന റോഡിലാണ് നിലവിലെ ഈ അവകടാവസ്ഥ. കൽക്കെട്ട് പുനർനിർമിച്ചില്ലെങ്കിൽ രാത്രികാലങ്ങളിൽ മാത്രമല്ല സ്കൂൾ വാഹനങ്ങളടക്കം തോട്ടിലേക്ക് വീഴാനുള്ള സാധ്യതയാണ് നാട്ടുകാരിൽ ആശങ്കക്കിടയാക്കുന്നത്. അടിയന്തിര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.